Ramchhung hmundangte rualin Hindi Ni (Hindi Dewas) chu vawiin khan Aizawl-ah pawh hman a ni a. Hemi pual inkhawm I & PR Auditorium-a Town Official Language Implementation Committee (TOLIC) buatsaihah chuan Education Minister Pu Lalsawtan Hindi tawng uar leh chhawmnun zel a pawimawh thu  sawiin Hindi Forthnight a hawng.

Minister chuan Indopui II lai vela Mizo engemaw zat ten Hindi an rawn thiam hawng a, chungte chu Mizo mipuiin kan ngaisang em em thin a ti. Rambuai a nih a Mizote India ram zau zawka kan chettlat tam vak loh lai vel atang khan Hindi ngaihsanna hi Mizote zingah a tlahniam leh ta ni a a ngaih thu te sawiin tunah erawh chuan ramchhung dapin Zofate kan in zarpharh tawh a. Hindi hlutna pawh kan state chhungah ngei kan hre thar chho ta mek a, hei hi chhawmnuna uar zel a duh thu a tarlang.

Mizoram school zawng zawngah Cl - I atanga Hindi chu zirtir nise English leh Mizo subject tluka dah ni thei se a duh thu te, ziak leh chhiar ai mahin a tawng zirtir ni thei se Minister chuan tha nia a rin thu a sawi bawk. India mi nih hi kan zahpui tur a ni lova, India hnam ziarang lam leh rimawi ngaisang ila, India ram tawngpui ber Hindi pawh i uar zel ang u, Pu Lalsawta chuan a ti.

Vawiin inkhawmah hian TOLIC Chairman Pu C. Lalrosanga, Dy. Director General NER - II leh DDK Aizawl hotupa chuan inlawmna thu sawiin Mizoram chhunga Central Sorkar department hrang hrangten Hindi uar kawnga an hmalaknate a tarlang a. Tolic Secretary Jenny Laldinglianin report a pe a ni.