Border Roads Organisation (BRO) hnuaia Project Pushpak chuan chawlhkar hnih awh Hindi Diwas lawmna September ni 1-14, 2018 chhung khan a hmang a. Vawiin khan Rajat Auditorium, Zemabawkah a kharna inkhawm neih a ni a, Mizoram Governor Pu Kummanam Rajasekharan chu Khuallian a ni. 

Governor chuan Mizo mipui, a bikin naupangte’n he Hindi Diwas lawmna phur taka an chhim chu lawmawm a tih thu sawiin, sawrkar laipui pawhin ram chhung leh rampawna Hindi chawikawng tura hma a lo lak tawh dante a sawi a. Mahni ram tawng (national language) - Hindi thiam chu inchhuanna tham a ngai tura chah in, hnamdangte nena kan inlaichhinna a ti tha in, ramdanga lehkha kan zir emaw hna kan zawn hunah thui takin min pui dawn a ni, a ti. Governor chuan Project Pushpak ten Mizoram ramria inkalpawhna kawng siam hna bakah thahnemngai taka Hindi chawikang tura hma an lakna chu fakawm a tih thu a sawi bawk a ni. 

He kharna inkhawmah hian Project Pushpak Chief Engineer Brig. Birender Singh chuan tunhnaia Kerala rama tuilian tuarte tanpui nan sipaite thawhkhawm atangin Khullian hnenah hian cheng nuai 1.5 cheque a hlan nghal a ni. 

He chawlhkar hnih chhung hian Project Pushpak Headquarters-ah essay inziahsiak leh inelna hrang hrang buatsaih a a ni a. Vawiina a kharna inkhawmah hian Hindi hmanga mipui hmaa thu in sawi thiamsiak buatsaih niin, BRO sipai leh Mizo mipui te an tel a ni. Governor chuan he inelnaa tithate hnenah lawman a hlan nghal a ni.