Directorate of School Education leh Central Institute of Hindi, Shillong Regional Centre tangkawpin an buatsaih ni sawm chhung awh Hindi Teacher/Pracharak Orientation Programme kharna hun chu vawiin khan SSA Aizawl District Conference Hall, Chaltlang- ah Pu ST. Zaduna, Joint. Director, Directorate of School Education hovin hman a ni.

Pu Zaduna chuan fuihna thu sawiin Hindi Teacher training-te hnenah chuan an thawhna hmun theuh ah mi dangte tana entawntlak ni tur leh naupangte pawh awmdan mawi leh nundan tha uar leh nasa zual zawka zirtir tura chahin, dawhtheihna leh inpekna tak tak nena an hna chu thawh a tulzia a sawi.

Prof. V.S. Shukla ,Regional Director, Central Hindi Institute, Shillong Centre pawhin thu sawiin Central Institute of Hindi Agra hian India ram hrang hrang Mizoram, Dimapur, Guwahati leh Shillong-ah te Centre engemaw zat a nei a, North East tan bik hian Shillong-ah Centre awmin Hindi lama hmasawnna atan a bikin Zirtirtute tan bika Orientation Programme buatsaih theih anih thu a sawi.

He Programme hi Zirtirtute infuih thar lehna tura tih a ni a, Teaching Method tha tak nei a, naupang hoten Hindi an zirtir theih nan he training hi buatsaih thin a ni a. Zirtirtute chu Hindi hmang uar sauh sauh tur leh naupangte pawh Hindi lama hma an sawn nasat zual theihna turin nasa zawka tan la sauh sauh turin Prof. V.S. Shukla chuan a fuih nghal bawk.

Khualzahawm Pu R. Lalthanmawia SDEO, Aizawl South pawhin Hindi pawimawhzia sawiin Hindi thiamlo chuan phai lamah harsatna tam tak an tawk thin a, tawng thiamna hian sang takah min dah thei a, Hindi Teacher te pawn Class lak lai chuan Hindi chauh hmang hram hram tur a ni a ti a, Text Book ringawt thiam lova Hindi chu a tak taka naupangte hnena thiamtir tur a fuihin naupangte chu Hindi in an tawng thei ngei ngei tur a ni tiin zirtirtu kalkhawmte chu a chah.

Vawiin programme-ah hian Hindi Teacher Training-te atangin thusawi ngaihthlak a ni a, sawihona hun te neiin he training atanga hlawkna an hmuh nasatzia leh an la thiam ngai loh thil tam tak an thiam belh thute zirtirtute chuan sawiin zawngchhang tlak an ti hle a ni.