India ramin zalenna a hmuh ni, Independence Day vawi 70-na lawmna atan School Education Department buatsaihin vawiin khan Mizoram chhung hmun hrang hrangah Freedom Run neih a ni.
Aizawl-ah chuan Freedom Run hi Chanmari Kawn leh Sikulpuikawn atangin zing dar 6:00 ah neih a ni a, Chanmari Kawn atanga tlante hi School Education Minister Pu H. Rohluna’n a vailiam a, India ramin zalenna kan nei chu a lawmawmin ropui a tih thu leh zalenna sualtu Mahatma Gandhi leh Jawaharlal Nehru te inpekna ropuizia a sawi a, Mizoram ngei pawhin zalenna kan nei chu kan vanneihzia hre renga a vawnhim kawngah mawh kan phurh thu a sawi.
Sikulpuikawn atanga Freedom Run-a tlante pawh Parliamentary Secretary Pu Joseph Lalhimpuia’n vailiam in India ramin zalenna vawi 70-na a thleng thei chu a ropuiin a lawmawm takzet a ni, a ti a, Freedom Run-a tel zirlai zawng zawngte duhsakna a hlan.
Chanmari Kawn leh Sikulpuikawn atanga Freedom Run-a telte hian A.R. Lammual pan khawmin Lammualah hian National Anthem ‘Jana Gana Mana’ sain hun tawite hman a ni a, zirlai 3000 vel an tel a ni.
Tukin Freedom Run-ah hian School Education Department hnuaia Secretary leh Director te bakah Officer-te an tel tha hle a, Freedom Run hi District khawpui hrang hrangah pawh neih a ni. L
ungleiah chuan Freedom Run-a telte hi AOC, Ramthar leh Serkawn atangin zing dar 6:30 ah an chhuak a, Ramthar atanga tlante hi DC Pu Abhijit Vijay Chaudhuri-in a vailiam a, AOC, Serkawn lam atanga kalte hi District Education Officer Pu Lalramthianghlima’n a vailiam a. Thuamluaia Mual-ah inhmukhawmin tawpna hun hman a ni a, Lungleia Freedom Run-ah hian zirlai leh zirtirtu 500 vel an tel a ni.
Mamit-ah chuan DC Complex leh Field veng atangin Freedom run hi neih a ni a, DC Complex atanga Freedom Run-a telte Addl. DC Pu H. Lianzela’n a vailiam a, Field Veng lam atanga Freedom Run-a telte Pu Ropuia, EE(PHE) in a vailiam a, Freedom Run-a telte hi Bazar vengah intawkkhawmin DC Pi Lalbiaksangi hovin hnam hla sain hun hman a ni.
Kolasib-ah chuan Kolasib hmar lam leh chhim lam atangin Freedom Run hi neih a ni a, hmar lam atanga tlante chu Pu R.Vanlalmuka, Dy. DPC, SSA-in a vailiam a, chhim lam atanga tlante chu Pu R. Lalramhluna, Dy. DPC, RMSA-in a vailiam a, Freedom Run-a tlante hi Venglai Bazar-ah intawkkhawmin DC Pu H. Lalengmawia hovin hun an hmang.
Serchhip-ah chuan Freedom Run hi Serchhip Bazar atangin chhim leh hmar zawngin an tlan a. Freedom Run-a telte hi Pu Lawmawma, District Education Officer-in a vailiam.
Lawngtlai-ah chuan DC Office Complex atangin Freedom Run hi neih a ni a, DC Dr. A. Muthamma, IAS-in thutawi sawiin Freedom Run-a telte hi a vailiam a, zirlai naupang leh zirtirtu 1200 velin Areopagi thlengin Freedom Run hi an nei.
Champhai-ah chuan CHANEM atangin Chhangphut Field thlengin Freedom Run hi neih a ni a, Freedom Run-a telte hi Addl DC Pu Lalzarliana’n a vailiam a, Dy. DPC, RMSA Pu C. Hualrikhuma hovin a kharna hun an hmang.
Freedom Run hi India ram hmun hrang hrangah August ni 15, 2016 atanga August ni 23, 2016 chhunga neih tur a ni a, He hun khar nan hian August ni 23, 2016 chawhma dar 11:00 ah India ram zirna in zawng zawngah a rualin National Anthem sak a ni ang.
