Project Sunrise buatsaihin vawiin khan HIV darh zel tur venna leh damdawi hmansual venna kawng Kohhran hmalakna tur sawihona Aijal Club-ah hman a ni.

Pu Lalrinliana Fanai, IAS, Commissioner & Secretary Health and Family Welfare chuan he hun hi hmanpuiin kohhran hrang hrang aiawh atanga he hun hmang tura lokalte lawmna thu a sawia, hemi hnu hian Dr. Bitra George, Country Director, FHI 360 chuan Mizorama kohhranin HIV dona leh drug addict enkawlna kawnga tha hma an lakna hrang hrang tarlanna hun hmangin helam hawia hnathawh hi Bible zirtirna anih dan a sawi.

MSACS Project Director Dr. Lalmalsawmi Sailo chuan HIV lama Mizoram dinhmun sawiin, Kohhranin HIV darh zel tur venna kawngah hmalakna mumal kan neih loh chuan, India rama HIV hluar lama pahnihna atangin kum 5 ral leh hnuah chuan natna ven zawh rual loh khawpa darh nasa dinhmunah kan ding thei a ni a ti.

Pi Betty Lalthantluangi, Jt. Director (TI) MSACS chuan Project Sunrise chungchang sawifiahin MSACS program kal lai ti chak lehzual tura NACO leh Center for Disease Control (USA) ruahmana kum 2015 a bul tan anih thu sawiin Mizoramah HIV hluarna Aizawl leh Champhaiah TI NGO 19 hmangin hmalak tan anih tawh thu a sawi.

He hun hmannaah hian Health & Family Welfare Principal Director Dr. K. Ropari chuan lawmthu sawina hun hmangin Mizo ngaihdana mipa uire ve thei lo anga ngaih hi pawisawilo nupui tam takin HIV hrik an kaina chhan nia a hriat thu a sawi.