Vawiin khan MLA rual kalkhawmte chuan HIV/AIDS leh Health Care Scheme chungchang Assembly House Annexe Recess Room-ah an zirho.

He hunah hian thusawiin Mizoram Chief Minister Pu Lal Thanhawla chuan Mizoramin India rama ber kaina chhe tak tak a neih te hi titlem turin beihpui kan thlak a tul tak zet tawh a ni, a ti. Za zela chhutin India ramah zuk leh hmuam kan ti nasa ber a, vaihlo kan hman nasat avang hian Cancer vei pawh kan tam ber a, HIV positive pawh za zela chhutin India ramah pahnihna kan ni bawk tiin Chief Minister chuan MLA kalkhawmte chu thahnemngai lehzuala a do hna thawk tur leh an thusawina hmun apiangah mipui zirtir hna bei ngawrh lehzual turin a sawm a ni.

Zirhona hi Health Minister, Legislative Forum on AIDS (LFA) Chairman ni bawk Pu Lal Thanzara’n a kaihruai a. LFA Secretary Dr.K.Beichhua chuan an hmalak dan tlangpui a tarlang a, MSACS Project Director Dr.Lalmalsawmi Sailo leh Mizoram State Health Care Society CEO Dr.Biakthansangi te chuan powerpoint hmangin Health Care Scheme leh HIV chungchang an sawifiah a ni.

MLA term kal laiah hian Health Minister hmalakna leh thahnemngaihna avangin July ni 7, 2015 khan MLA kalkhawmte chuan Legislative Forum on AIDS (LFA) an din a. Chairman leh Secretary bakah Executive Committee member mi 12 an awm. HIV/AIDS lama hmalakna atan MLA fund atangin cheng nuai 1 theuh thawhkhawmin cheng nuai 40 tlingkhawm hi MSACS account-ah a lut fel tawh a. Kumin January ni 27 khan Health Minister room-a LFA thukhawm chuan MLA fund thawhkhawm hman dan tur a rel angin CD4 Count Machine, syringe leh needle, condom, STI damdawi, blood donation campaign atan leh tul dang atana hman turin sum hi an dah a ni.

October 1990 khan a vawikhatna atan Mizoramah HIV hrikpai hmuhchhuah a ni a. Hemi kum atang hian he natna hian kiam lam aiin pun lam a pan chho zel a. Kum 2000 hma lam chuan HIV hrikpai hi damdawi hmangsual thinte leh mipat hmeichhiatna lama buan chaklo deuh ni a ngaihte zingah hmuhchhuah a ni deuh ber a. Kum 2000 hnu lamah mipat hmeichhiatna atanga kai hmuhchhuah an tam tual tual a, kum 2010 hnu lamah phei chuan HIV hrikpai hmuhchhuah thar zawng zawng zinga za zela sawmsarih chuang zet chu mipat hmeichhiatna atanga kai an ni tawh a, an zinga 70% aia tam hi mipui mimir zing atanga hmuhchhuah a ni. MSACS Project Director Dr.Lalmalsawmi’n a sawi danin tun dinhmunah Mizoramah HIV hrik pai mek hi za zelah 0.67% niin percentage a lakin India ramah pahnihna kan ni a. A do let hnathawh hi a hmanhmawhthlak tak zet tawh a, nasa taka hma kan lak loh chuan tun atanga kum 5 a ral leh chuan ven hleihtheihloh khawpin a darhzau a hlauhawm hle a ni, a ti.

Rashtriya Swasthya Bima Yojana (RSBY) leh Mizoram Health State Health Care Scheme chungchang sawitu Dr.Biakthansangi chuan damloh nikhua a hman tangkai theih tur he scheme pahnihte hi a nihna ang taka hman tangkai a nih theih nan mipui hrilhhriat a pawimawh hle, a ti a. Inziahluh hun lai March atanga May, 2016 chhung hian chhungtin te chu sub-centre theuhah inziahluh tur a ni a, Sub-Centre awmlohna khuaah te chuan thawktuten an pan dawn tih sawiin CEO chuan MLA bial theuhah mipuiten hun tiam chhunga an inziahluh hman ngei theih nana inhrilhhriatna kawngah MLA-te tanpuina a ngen a ni. Heng scheme pahnih hmang hian sawrkar hnathawk ve lote’n an damlohva inenkawlna sum an bill thei a ni.