Vawiin khan Govt T.Romana College leh Mizoram Library Association tang kawp buatsaih khawtlang nun danglam zela Library pawimawhna zir hona Seminar chu I&PR Auditorium-ah Art & Culture Secretary Pi Thanhliri Pachuau, State Library Committee-a Chairman ni bawk chuan a hawng.
Khuallian Pi Thanhliri Pachuau chuan library chu mipuite zirna in tia hriat a nih thin thu sawiin, kum, hnam, sakhua, vun rawng, nihna eng mah sawi lovin, eng mi pawhin a mamawh a zawna a hmuh theihna hmun a nih avangin a pawimawh hle a ni, a ti a. A enkawltu (librarian)-te chu mipui rawngbawl hna pawimawh tak vuantu an ni tih hre reng tura chahin, mipui tana tangkai tur zawn, rem khawm leh sem darh kawngah theihtawp chhuaha thawk tur te, a dawrtute tana awlsam leh an hlawkpui theih ber tur kawng zawnsak thin tur leh khawtlang leh ramin hma a sawnna tura an mawhphurhna pawimawh tak chu thahnemngai taka kengkawh tlat turin a ngen a ni.
Mizorama library dinhmun leh than chhoh dan sawiin, Khuallian chuan kum 1969-a Aizawla Sub-Divisional Library din a nih hma kha chuan vantlang lehkhabu zem (public library) hi Mizoramah hriat a ni ngai lo va; kum 1974-ah Mizoram State Library din leh niin, a hnu deuhvah Lunglei leh Saiha-ah District Library din a ni leh a; chuta tang chuan library hi a lo lar chho ta a ni, a ti a. National Mission on Libraries (NML)-in vantlang library dinna turin state sawrkar nena intum semin sum leh pai tanpuina a pe thin a; Mizoram sawrkar paw’n library tihchangtlun nan hma a la reng a ni, a ti. Art & Culture Secretary chuan tun dinhmunah Mizoramah State Central Library pakhat, District Library panga leh sawrkar hriatpui leh pawm library 480 a awm thu a sawi bakah, Raja Rammohun Roy Library Foundation (RRRLF) leh state sawrkar matching scheme hnuaiah NGO library 89 sak a nih tawh thu leh sawrkar hriatpui library-te chu lehkhabu leh an mamawh bungruate pek an nih thin thu a sawi bawk.
Mizoram University-a School of Economics, Management & Information Sciences (SEMIS) Dean Prof. Pravakar Rath-a chuan seminar thupui laimu sawi fiahin, tunlai khawvel thang chho zelah mipuite’n hun awl an nei tawh lo va, library-a an mamawhte pawh awlsam, hun duh tlem leh an mamawh phuhru tho sia hmuh an duh tawh a; an duh an hmuhna leh an pan fo tur library ni turin a enkawltute paw’n tan lak a, tunlai technology te pawh hman tangkai thiam a pawimawh a ni, a ti.
Seminar hawnna inkhawm hi Organising Chairman, Asst Prof. Dr Malsawmliana’n a kaihruai a; Organising Secretary Pu S.Lalnunpuia, Govt T.Romana College Librarian (Sr)-in seminar chungchang report a pe. Principal Dr Lalrintluanga chuan inlawmna thu sawiin, tunlai thangtharte’n lehkha an chhiar tlem ta hle hi mobile phone leh computer vang te a ni em tih ngaihtuah ngun a tul thu leh, lehkha an chhiar tam leh theih nan engtia tan lak tur nge tih chu chona lian tak a nih thu a sawi.
He National Seminar on “Role of Libraries in Changing Society : Problems & Prospects” hi University Grants Commission – North Eastern Regional Office (UGC - NERO) leh Indian Council of Social Science Research – North Eastern Regional Centre (ICSSR - NER) te sponsor niin, ni hnih awh tur a ni a; library chungchang, harsatna awm thin leh hma sawn zel dan tur te zir ho leh sawi ho thin a ni ang. He seminar-ah hian sawrkar hnuaia public library-a thawk te, college hrang hrang librarian te, NGO hrang hrang library enkawltute an tel a ni.
Govt T.Romana College-ah hian Department pariat (8) awmin, kum 2015-2016 academic session-ah zirlai 850 an nei a. College Library-ah lehkhabu volume 8000 vel neiin, hei hi Software for University Libraries (SOUL) hmangin ‘automation’ kalpui a ni.
