National AIDS Control Program, Ministry of Health and Family Welfare, Governtment of India leh Mizoram sawrkar tangkawpin ni hnih chhung awh HIV/AIDS dona kawnga hmalak dan tur duangin Review Meeting of Integrated HIV/AIDS Action Plan, Mizoram an buatsaih a. Health Minister Dr. R.Lalthangliana chuan he programme hawnna inkhawm hi vawiin khan Taxation Department Auditorium, Aizawlah a hmanpui a ni.

Dr. R.Lalthangliana chuan Mizoram chhunga HIV/AIDS darh nasa lutuk do turin hemi kawnga hma latu mithiamte ngun leh zuala Mizote mizia, nunphung leh rilru puthmang zirchiang turin a sawm a. Mizoram State chhungah National AIDS Control Programme awmze nei zawka kalpui a nih theih nan State dangte nen kan inanlohna tam tak hre chunga hmalak tul a tih thu a sawi. Health Minister chuan HIV/AIDS chungchang inzirtirna programme uar lehzuala kalpui zel tul a ti a, amah ngei pawhin Mizorama Kohhran pawl hrang hrang leh tlawmngai pawl hruaitute a kawm tawh thu leh kawm zel a tum thu a sawi a. Sawrkarin HIV do nan Budget-ah a hranpaa sum dah a tum thu leh he natna hlauhawm tak a darh zel loh nan nasa lehzuala hmalak tum a nih thu a sawi bawk. Dr. R. Lalthangliana chuan ram chhung hmun hrang hrang leh ram pawn atanga mithiam lo kal khawmte hnenah lawmthu sawiin HIV/AIDS dona programme duangtu, HIV/AIDS dona kawnga India rama mi thiam ber berte telna he review meeting hman mek atang hian he natna hlauhawm tak Mizoram atanga umbo a nih theih nan kalphung thar an duan chhuah ngei a beisei thu a sawi a ni.

Pu Sanjeeva Kumar, Special Secretary leh DG (NACO & RANTCP), National AIDS Control Organisation, Ministry of Health and Family Welfare, Government of India chuan he review meeting hawnna thu a sawiah Mizoram sawrkarin HIV/AIDS do na tur budget-ah sum dah a tum thu leh hma a lak mek dan te thlirin HIV/AIDS dona kawngah State Sawrkarin theihtawp a chhuah tih a lang a ni, a ti. Ziak leh chhiar thiam tamna, tlawmngai pawl chak tak awmna, a rama mi chengte tlem bawk si Mizoram State-ah HIV/AIDS dona kalpui mek chu sawt hle awm tak a nih laiin nasa taka a hluar zel zawk chu he natna dona kawnga hmalak mek dan enfiah a tul niin a lang, Special Secratary chuan a ti a. Ni hnih chhung Review Meeting neih turah kalphung pangngai hi a tha tawk ta lo em ni tih inzawt chunga ngaihtuahna thar hmang turin mi thiamte a chah a ni.

December ni 6 thleng awh tur he review meeting ah hian UNAIDS, North Eastern Council, NACO, Mizoram National Health Mission, Mizoram State AIDS Control Society leh Health Department aiawhte an tel a. Hmar chhak state hrang hrang, a bik takin Mizoram State bitumin HIV/AIDS do na kawnga hmalak dan tur an duang dawn a ni.

Hawnna inkhawmah hian NACO Assistant Director General Dr. Shobini Rajan, NACO Deputy Director General NACO Dr. Naresh Goel, NEC Adviser Gopal Chhetri, CDC DGHT India Director Dr Melissa Nyendak, NHM Mission Director Dr Eric Zomawia, UNAIDS Country Director Dr Bilali Camara, NACO Joint Secretary Alok Saxena ten thu an sawi a. Tlawmngai pawl aiawhin CYMA Asst Secretary Dr. Malsawmliana leh kohhranho aiawhin Rev Lalrinmawia’n thu an sawi bawk a ni.