Khawvel hmun dang rualin Hlemhlet Do Ni( International Anti-Corruption Day) chu Aizawl ah pawh PRISM buatsaihin I & PR Conference Hall-ah Seminar buatsaih a hman ve a ni a, Mizoram Larsap Pu Vakkom Purushothaman chu khuallian niin Seminar hi a hawng a ni.

Governor chuan hlemhletna leh eirukna hian lanchhuahna tam tak a neih zingah politics lamah te, sum leh pai leh mipui nunphung ah te hian a langsar zual thin a ni a ti a. Hlemhletna chuan mipui rorelna hnukpui ber a sawinghing a, hmasawnna a ti thuanawp in Sorkar kalphung tha lai pawh a ti derthawng thei thin a ni a ti.

Larsap chuan mipui ten kawn gtha duha hma an lakna hrang hrangte pawh eirukna chuan an phurna leh inpekna zawng zawng a tihhniam sak thin bawk a, thamna it leh thamna lak ching te hian khawtlangah inthluahthlakna namen lo a hring thin a ni a ti. Governor chuan politics ah khelh ve hunlaia a tawn hriat hrang hrang sawi chhuakin corruption dona lamah hian midangte sawisel leh puhmawhna ringawt hian mi hlemhle leh eiruk chingte a hum hluah thei zawk a ni a ti a. Eirukna hi Mizoram ramah pawh a bang bik a rin loh thu leh politics lamah hlemhletna ai mahin Sorkar hotu lian te chungah a hlaur zawk ni a a ngaihthu a sawi a ni.

Pu Vakkom Purushothaman chuan UN Assembly in he Ni hman a rawtchhuah dan tlangpui sawiin he hun hlu tak a chanvo tha tak PRISM in an pek avanga a lawmthu a tarlang a, Corruption do tur hian PRISM mai bakah tlawmngai pawl hrang hrang lo pen chhuak se a duh thu a sawi a ni.

Vawiina Seminar bultan inkhawm hi Pu R Zamawia’n a kaihruaia. Pi Lalsangkimi Sailo chuan eiruk do kawnga a thu ziak a chhiarchhuak a sawihona hun tha tak hman a ni. Seminar ah hian pawl hrang hrang aiawh bakah Minister leh MLA hlui michal lang engemaw zat an tel a ni.