I&PR Minister Pu Zodintluanga chu chawlhkar khat thangin a bial chhunga NLUP dawngtute hmalak dan enfiah tur leh sawrkar department hrang hrangin a bial chhunga kut an thlak tawhte hmuhpui turin a zin chhuak a; nimin khan tluang takin Lunglei a thleng.

Pu Zodintluanga chuan a bial chhung khuate a tlawh kim hle a;Krismas lo thleng mai tur atan duhsakna chibai a buk a ni. NLUP chungchangah a bial chhunga trade hrang hrang thlangtute chu fuihin, “NLUP hi kuthnathawktuten leirem in rah theihna tura chempui leh hnathawhkawr a ni a; nakina mahni nawmsakna tur ngaihtuah lova Bingtaii ang maia a chi ei zo nghal ringawtte chu sawrkarin a dim dawn lo a ni” a ti. I&PR Minister chuan retheihna avanga Zoram hmun hrang hranga thalai lehkhathiam thei tak takten zirna tha lehzual an chhunzawm theilo chu pawi a tih thu sawiin, “Hetiang dinhmuna ding mek chhungkaw tam takte hi sawrkar chuan a hrereng a, chuvang chuan NLUP hi a ruahman a ni. Rinawm leh tihtak zeta kan thawh chuan kan tu leh fate pawhin zirna tha zawk, ramchhung leh pawn lamah an chhunzawm thei tawh ang a; Zoram thalaite zingah IAS te leh officer lian tak tak thingtlang kilkhawr atang pawhin kan pung deuh deuh thei a ni” a ti bawk.

Thorang bial chhunga sawrkar hmalakna hrang hrangah mipuite an hlim hle a. Pu Zodintluanga chuan, “Sawrkar hnathawkte hian mahni awmna hmuna chenchilh a pawimawh a; chutih rual chuan sawrkar hnathawkte duat pawh hi a khawneitute mawh a ni. Khual khaw hla tak atangin an rawn mikhual a, mikhual kawl theilo khua nilo tura tanlak a pawimawh a ni” a ti.

NLUP hnuaia hamthatna dawngtute chu Pu Zodintluanga hian anmahni huan lo ramah a kalchilh a; I&PR department chuan hmun penhleh tak taka NLUP dawngtute hnathawh dan chu uluk takin thla an la bawk a ni. Sesawm khuaa NLUP hnuaia fu chin thlangtu Pu Ruata chuan sawrkar atanga cheng nuai khat a dawn hma a ama kutkawiha cheng nuai khat thawhchhuah hman a tum thu a sawi a. “Ka tan chuan NLUP hnuaia ka fu huan siam hi ka Eden huan a ni a; kan chhungkua hian tlai dar ruk hmain kan hawsan phal lo” a ti.