Nimin chawhnu dar 2 khan Vairengte Cold Storage hmun a, Mizoram Broom Industry (MBI) Ltd. hmunphiah siamna hmun chu Pu Lal Thanzara, Parliamentary Secretary to Chief Minister te nupa leh official pawimawh te nen an tlawh.

Mizoram Broom Industry Ltd. hi Pu T. Lalengthanga leh Pu B.T. Nghinglova te tangdunin anmahni sum senga an din, NLUP Monitoring Cell, Wg. Cdr. Nghinglova te buaipuina in hmunphiah siamsa lei duh (market) company 5 an hmu tawh a ni tih Pu B.T. Nghinglova chuan hemi hmun a Hmunphiah vailiam tur inkhawm tawite leh urhsun takah hian a sawi.

He hun a telve Pu K. Lalrinthanga, MLA chuan, Kolasib District chhungah NLUP ah Hmunphiah Trade thlang an awm nual a, Mizoram Broom Industry leh NLUP hotute hmalakna azarah Market tha tak neiin a lo awm ta chu bial mipui tan thil lawmawm tak anih thu sawiin, tun sorkar ah hian kawlphetha leh thil dang dangah hmasawnna awm hian Mizo mipuite min chawikang dawn, tih a sawi.

Pu Lal Thanzara chuan, MBI Ltd ten anmahni sum senga hmunphiah Industry an siam chu ngaihsan awm tiin, anmahni kaltlangin NLUP a hmunphiah trade thlangtute pawhin harsatna awm lova, hralhna an hmuh theih a beisei thu sawiin, NLUP scheme ah Mizo mipuite tana tha tur leh awlsam zawka hralhna tur anih chuan sorkar pawhin puih an tulna ah hma a lak a rin thu a sawi.

NLUP chungchangah mi hlawh ai te, hnathawhna tur dang atangte a pawisa pawt khawm ah mi thenkhat a nilo tih hrechiang reng tuten mipui bum nan dawt an sawi thin chu thalo a tih thu sawiin, Plan ah chuan a lut ngei a, mahse NLUP tana hman tur tih chiang takin Planning Commission in ziakin a hriattir tih a sawi. Kut hnathawktute leh mi rethei dawm kanna kawng dal tute thu ngaithla lo turin a chah.

NLUP a hmunphiah trade thlangtute tan mimal tlawmngai leh NLUP hotute hma lakna chu chhuanawm tiin, India ram mai nilo, Russia ram leh ram dang ah te Mizoram hmunphiah hralh a ni chu lawmawm tiin,’he hmanraw tlawmte atang hian Mizote retheihna khur atanga khaichhuah kan nih ka beisei’ Pu Lal Thanzara chuan a ti.

Inkhawm hman anih hnu hian, hmunphiah phiah 40000 phurtu motor chu Pu Lal Thanzara chuan “Mizoram mipuite malsawmna tam tak min thlen turin, he hmunphiah Russia ram kal tur hi ka vailiam e” tiin a vailiam ta a ni.

Kumin chhungin hmunphiah nuai khat an rawn order chu, a buatsaihna khawl lamah harsatna a awm deuh avangin an tlin zo lova, 60000 dang thawn chhuak leh vat turin MBI Ltd. chuan hma an la mek a, hmunphiah chingtute pawh tan la turin an ngen bawk a ni. Hmunphiah phur motor hian Mumbai ah a phur thla ang a, chuta tangin Dubai leh Russia ramah a lut dawn tih MBI hotute chuan an sawi.