Central Young Mizoram Association (CYMA) huaihawta NGO leh Education Department hnuaia Service Association hrang hrangin School Academic Session thlak chungchang an ngaihtuah a, state tam zawkin an tih dan anga Mizoramah pawh April atanga a kum leh March thlenga Academic Session neih ve an duh thu tarlang a nih hnu khan nu leh pa, zirlai leh zirtirtu leh School neitu tam tak ngaihven a hlawh ta em em a. School Education Department hnuaia Consulative Committee MLA engemaw zat awmna pawhin a ngaihtuah mek a nih avangin Sorkar pawhin Academic Session chungchang hi a ngaihtuah mek a ni a.

School Academic Session thlak hian nghawng thui tak a neih dawn avangin uluk taka ngaihtuah a ngai a. Session hi thlak thut a nih chuan zirlai leh nu leh pa tan harsatna a siama thei a. Phai lam a zirlai leh Mizoram pawn lam a zirlaite pawhin harsatna an tawh lohna turin ruahmanna fel tak buatsaih a ngai a. Kan hman mek Academic Sessionn hi thlak dawn pawh ni ila, nakum April thlaa tan tur chuan January, February leh March thla chhunga zirlaite awm dan turah remchan lohna leh dinhmun laklawh tak a awm dawn a.

Mizoram sorkar hian Academic Session hi thlak dawn pawh ni se, nakum 2012 a school hawn leh luh hun chu a pangngaiin a awm phawt dawn a ni tih leh hetiang thu tlukna hi siam anih pawhin kum 2013 April thla atanga bul tan chauh a ni ang tih mipui hriattir a ni e.