2423/2022-2023
Aizawl the 25th October 2022 : Vawiin khan Lengteng bial chhung, Saitual District-a Hliappui khua chuan an khaw kai thar kum 50-na Golden Jubilee chu Hliappui Community Hall-ah an lawm a, Lengteng bialtu MLA leh Human Resource Development Board Vice Chairman Pu L. Thangmawia chu khuallian niin a hmanpui a, Golden Jubilee lungphun hawngin Jubilee Souvenir a tlangzarh nghal bawk a ni.

Khuallian Pu L. Thangmawia chuan Hliappui khawtlang chu Golden Jubilee chibai bukin Hliappui khuain kum 50 a tling ta chu a lawmpui thu a sawi in he Golden Jubilee hi inngaihdam tawn nan hmang ila, midang ngei leh huat deuhte kan lo nei a nih pawhin Jubilee pualin i ngaidam ang u a tiin a sawi a. Covid hripuiin kum hnih chuang lai min nuai a, India ram mai ni lo, Asia mai ni lo, khawvel pumin a buaipui a. Pathian hruaina leh Mizo mipuite tanrualna avang liau liaua vawiin ni hi thleng thei kan ni tih i hre nawn leh ila, he hun harsa kan tawh laia MLA ka nih avangin in mi beisei ang ka pha lo hle ang tih a hriathu leh ngaihdam a ngaihna ah ngaihdam mipuite hnenah ah a dil tak zet zet thu a sawi a. Lengteng bial tana kan thawh hona kawngah Sorkar Official-te leh Ram leh hnam tana ka thawhpui, kan Minister leh MLA-te chungah lawmthu sawiin, 23rd Arpril 2020-a Hliappui khua-a rial nasa tak a tlak avanga In 200 chuang lai a den chhiat lai, hun harsa tak Hliappuiin a tawh lai khan kan hotute leh mi tlawmngaite'n kan harsatna te hria in min pui nasa em em a, a bik takin Saitual District DC Office a thawkte, SDO(Civil) leh BDO Ngopa te, Disaster management leh Rural Development department-te leh a changtu Minister te, State Disaster Committee-te chungah pawh vawiin Hliappui ni bik kan hman ni ah hian bialtu MLA a nih angin lawmthu a sawi a ni.

Jubilee lawmnaah hian Pi Margaret Lalrinawmi Fanai, Addl DC leh Project Director DRDA Saitual District leh official dang-te pawhin an telpui a. Pu F.Ngurthuama, VCP & Chairman Jubilee Organising Committee-in kaihruaiin Lt. Vanlawmpuia  CO, Salvation Army-in hunserh hmangin Pu.Lalbiakthanga Secretary Jubilee Organising Committee chuan report a pe a,  Pu Lalthaliana, Vice Chairman Jubilee Organising Commitee in inlawmna thu sawiin Upa Lalsangliana'n Hliappui khaw luah chhoh a nih dan a sawi bawk.