2424/2022-2023
Aizawl the 25th October 2022 : Vawiin khan School Education Minister Pu Lalchhandama Ralte chuan Mizoram Primary Teachers' Association ten Synod Conference Centre-a endowment fund an sem chu khuallian niin a hmanpui.
Minister chuan he hunah hian thusawiin MPTA ten zirlai harsate țanpuina tur endowment fund an sem chu lawmawm a tih thu leh zirtirtute kawng hrang hranga an luangliam țhin chu lawmawm a tih thu a sawi a, pe chhuak tam apiang an hlim țhin a ni a ti. Minister chuan țanpuina an sem chu a bul țanna ni se, chhunzawm zelin midangte tihhmuhtuah țang chho zel se, a duh thu a sawi. Minister chuan zirtirtuten midangte țanpui nan ni khat hlawh te, charity fund te, raltlante țanpuina te an lo pe tawh țhin a, tunah endowment fund sem a lo ni ta chu a lawmawm hle a ni a ti.
Mizoram sorkarin zirna hi ngaih pawimawhah a nei a, covid hrileng harsa karah a theih ang angin thawh zel a ni a, mipuite pawhin sorkar sikulah rinna an nghat chho zel a, tun hmaa sikul khar leh sikul kaihkawp tur ri tam tak kha tunah chuan sikul khar lam a ri ta meuh lo tih sawiin sikula hming ziak an pung a, classroom indaih loh thu te, țhutthleng leh dawhkan indaih loh thu te hriat tur a tam ta a, zirna sikula thawk nih te, a enkawltu nihte pawh a nuam ta hle a ni a ti bawk.
Minister chuan zirtirtute chu sorkar hnathawk dang ang an ni lova, mipui vantlang ngaihsan an ni țhin tih sawiin zirtirtute chu eizawn nan mai ni lo, Pathian rawngbawlna thinlung pua thawk turin a fuih. Zirna lama țhahnemngai tlawmngai pawlte, khawtlang hruaitute leh kohhran te chu thawhpui thiama, neitu nihna thinlung puttir thiam țul a tih thu sawi bawk. NEP 2020 duh dan angin School 331 ah Balvatika hawn a ni a, KG I&II hawn țan a ni a, zirna lama hmasawnna a kal chho zel a ni a ti bawk.
Vawiina MPTA ten endowment fund an semna inkhawm hi Pu Rosangzuala Vice President MPTA-in a kaihruai a, Pu R.Zonunmawia President-in fuihna thu a sawi a ni. MPTA te hian zirlai te țanpuina hi MPTA sub Hqrs tin ațanga zirlai pakhat zel thlan chhuah zirlai 19 te hnenah an sem a, zirlai pakhat hi ₹ 5000/- zel an pe a, Aizawl an panna senso an tumsak bakah, Aizawl khawpui chhunga hmun pawimawh an zirna atana țangkai tur hmun hrang hrang an fanpui bawk.
Attachment
- Loading attachment...
