Vawiin khan Sakawrdai khawtlangin Pu Lalchhandama Ralte, School Education Minister lawmna hun an hmang.

Pu Lalchhandama Ralte Minister chuan thusawiin Hmar khawthim zangkhawbungbut hnanah kawtchhuah thar siam tum a ni tih sawiin he lai bial tan hian development lamah thawh tur a tam hle a ni a ti a. Manipur lam kal pawhna tur leh Bagha lam kalpawhna tur te project siamin buaipui tum a ni a, hun rei lote chhunga zawh mai theih a ni dawn lo tih erawh chu hriatpui turin a ngen. Hmasawnna kawng chikim he bial hian a mamawh a ni a ti bawk. Hnathawh kawr haktirtu mipuiten mahni hmazawn theuhah ram tana thawk tur leh amah ngei pawh thawhpui theuh turin a sawm a ni. Minister chuan party nihna thinlung dah bova hmasawnna hna thawk turin mipuite chu a sawm a, pachhia leh retheite khaichhuahna tur SEDP hmangin thawh a nih tur thu a sawi bawk.

Minister chuan  zirna lamah hnathawh tur a tam hle tih sawiin sorkar tharin zirna leh hriselna lam hi ngaihpawimawhah a neih chho dawn a ni a ti bawk. Khawtlang hruaituten an mamawh chi hrang hrang a hnena an thlente chu a theih chin chinah bawhzui a nih tur thu a sawi bawk. Sakawrdaiah High School thar hawn tum a nih thute leh Helicopter service a awm theih nan Helipad siam tum a nih thu a sawi bawk.    

Minister hian Sakawrdai a thlen hma hian Ratu-ah amah lawmna hun hman a ni bawk a. Minister chuan amah lo hmuaktu Ratu khawtlang mipuite leh zirlai kalkawm hmaah thusawiin zirna lamah hmar tlangdung zirna hian hmasawnna rahbi a thleng dawn a ni a ti a. Ratu Higher Secondary School lumpsum grant-in-aid a hlankai hlim tuam hlawm nan tanpuina pek a nih tur thu a sawi. Mipuite chu lungrual taka tlangdung hmasawn nana hnathawhpuiah a sawm bawk a ni.

Sakawrdai khelmuala Minister lawmnaah hian Pu C.Lalmuanpuia, MLA pawhin thu a sawi a, mipuite chu bialtu MLA leh Minister ring ngam turin a sawm a, zirlai kalkhawmte chu ram leh hnam tana chhawr tlak thiamna neih tum turin a chah a, Mizo nuna tlawmngaihna tlahniam mek chawi dingtu ni tur leh aia upate zah thiam ni turin a chah bawk.