Vawiin khan Secretariat Conference Hall, Mizoram Secretariat, New Capital Complex Aizawl ah Health Minister Dr R Lalthangliana leh Health & Family Welfare Department a hotuten inkawmna hun an hmang a, Pu Lalrinliana Fanai, IAS, Commissioner & Secretary in he hun hi kaihruaiin Dr Lalrozama, IAS, Mission Director (NHM), Dr F Lallianhlira, Principal Director, Dr H Lalchungnunga, Director, Health Services, Dr T Lalhmangaihi, Director, Hospital & Medical Education te bakah District tin atangin Chief Medical Officer leh District Medical Superintendent leh hotu dangte an tel bawk a ni.

Health Minister Dr R Lalthangliana chuan,”Socio-Economic Development Programme ah hian hriselna hi kan ngai pawimawh hle a, mipui kan hrisel zawk nan invenna lama hmalakna hi nasa zawka kalpui a ngai dawn a ni,” a ti a,”Damlo tih tlemna kawng a hma kan sawn chuan inenkawlnaa senso kal ral tur kha kan hum thei dawn a ni,” a ti. Health Minister chuan Mizoram chu HIV vei sanna ber leh Cancer natna tamna State kan ni chu pawi a tih thu sawiin,” Heng natna khirh tak takte tih hniam a nih theih nan ngun taka ruahmanna siam a ngai a ni,” a ti. Dr R Lalthangliana chuan sawrkar hmalaknaa In leh khawl tha tak tak neih a mahse enkawltu leh enkawl zui ni ta lo tam tak awm thin chu pawi a tih thu a sawi a,”Hma lakna kan tan a nih chuan, hma lakna zik tluak a ni tur a ni” a ti. Health Minister chuan Health & Family Welfare department a thawktute chu mihring hriselna leh damna an kutah thui tak innghat a nih avangin an hna a chiang tur leh an mahni pawimawhna inhre thar turin a chah a, rintlak tak leh inpekna nen a hna thawk turin a fuih bawk.  

Vawiin inkawmnaah hian district tin atanga CMO leh DMS ten an hnathawh, an hma lakna leh harsatna tlangpui tar lanna hun an hmang a, AYUSH, MSACS, Food & Drugs, State Referral Hospital leh Nursing a hotute atangin an hmalaknate ngaihthlak a ni bawk.