Sports & Youth Services Minister Pu Zodintluanga’n vawiin khan Mizoram University-a Hmarchhak huap National Service Scheme (NSS) thalaite intawhkhawmna ‘North East NSS Youth Festival 2015’ hawnna programme MZU Multipurpose Hall-ah neih chu khuallian niin a hmanpui.
Pu Zodintluanga chuan Hmarchhaka hnam hrang hrangte hian zirna leh hna lamah te ngaihhnathiamna reservation leh quota te kan nei a, mahse Hmarchhaka zirlai leh thalaite hian mahni thiamna, tumruhna leh taimakna nen theihtawp kan chhuah chuan quota tel lovin midang ang te bawkin kan zirlai naupangte hian hlawhtlinna an hmuh ngei ka ring a ti a. Chumi atan chuan mahni inrintawkna nen inbuatsaih turin he huna thalai kalkhawmte chu a chah a. Infiamna lama Hmarchhak hlawhtlinna te sawiin infiamna lama kan hlawhtlin ang hian thil dangah pawh hlawhtlinna leh mi theih ang kan Hmarchhak thalaite hian an thei ve a chumi atan chuan theitawp chhuaha tan kan lak a ngai a ni, a ti.
Minister chuan ram in hma a sawn zel theihna turin inpumkhatna tha tak neih chhoh zel a pawimawh thu sawiin inpumkhatna tichhe thei boruak te awm thin mahse Hmarchhak mite hian ram inpumkhatna atan theitawp chhuah zelin leh hemi atan hian kan thawk chhunzawm zel tur a ni, a ti. Hmarchhak state hrang hrangte inkara inunauna leh inngainat tawna boruak a that zawk theih nan leh remna, muanna leh hmasawnna kan neih theih zel nan zirlai naupangte chu an ngaihtuahna te hmanga tan la turin a fuih a ni.
Pu Zodintluanga chuan NSS kaltlangin Clean India Mission Swachh Bharat atan nasa takin NSS volunteers ten hna an thawh theih thu sawiin an state theuh ah te faina beihpui thlak chu ngaipawimawh a, NSS hmalakna chi khat atan kalpui turin a chah a. Hetianga intawhkhawmna chu thiantha insiamna leh hnam dangte chanchin leh ziarang zirna tha tak a nih thu sawiin hlim leh hlawk takin Youth Festival hi hmang turin a duhsakna hlan bawk a ni.
He programme hmanpuitu dang Mizoram University Vice Chancellor Prof. R. Lalthantluanga chuan remna leh muanna tel lovin Hmarchhakah hmasawnna a awm theih loh thusawiin zirlai naupangte chu remna palai ni turin a chah. Hawnna programme kaihruaitu Pu Zothankhuma, IAS, Secretary, Sports & Youth Services chuan Mizorama NSS hnathawh te sawiin tunlai thiamna hmanga lo neih dan te, agro based industry lam te leh adventure sports te chu Hmarchhak thalai te tan eizawnna kawng tha tak a nih theih thu a sawi. Thu hmahruai sawitu Pu Sunil Kumar Basumatary, Youth Officer, NSS Regional Centre, Guwahati chuan Mizoram NSS Cell chu Hmarchhaka hna thawk tha a nih thu a sawi.
Vawiina Festival hawnna programme ah hian Hmarchhak state hrang hrang aiawh te hian an hnam lam te an entir a ni.
North East NSS Youth Festival hi NSS Regional Centre, Guwahati leh NSS (Cell) Sports & Youth Services Department tangkawpte buatsaih niin February ni 19 thleng a awh dawn a, he Festival a tel turin hian Hmarchhak state hrang hrang atangin zirlai naupang 300 vel rawn zin a. Festival chhung hian nitin thupui neiin thil zirhona hun an hmang dawn a ni.
