Vawiin hian Sawrkar laipuia Ministry of Tribal Affairs Secretary, Dr. Hrusikesh Panda, IAS chuan Lawngtlai Electric Veng a LADC Industry Department enkawl lai Industrial Training and Production Centre leh Lawngtlai khaw kiang Upper Saikah khuaa loneitute leh school zirlaite a tlawh.

Lawngtlai a cham mek Pu Hrusikesh Panda hian tukin zing dar 8 khan Lawngtlai Electric Venga Lai Autonomous District Council hnuaia Industry Department enkawl lai, puan tahna hmunpui (Industrial Training and Production Centre) a tlawh a, he puantahna ah hian puan tahkhawl 14 awmin puan tahtu 13 leh Industry enkawltu mi 2 ten hna an thawk mek a, Lai hnam puan chi hrang hrang an tah thin a ni. Pu Hrusikesh Panda chuan Sari leh State pawna thawnchhuah theih chi emaw Kamis atana thui theih tur chi puan dehchuah a that a rin thu a sawi a, chu chuan hna thawh tur zau zawk leh hlawk zawk a thlen sak theih a beisei thu a sawi a ni.

He mi zawh hian Secretary hian Upper Saikah khua tlawhin Village Council te kawmna a nei a, khawtlang tana hma an lak thin dan leh kum tin tlangram loneih tibo tura hma an lak dan te a zawt, tlangram loneih bansanna atana thil pawimawh nia a hriatte a sawi bawk. Upper Saikah Village Council a hmeichhe member awmchhun chu a bik taka kawmin hmeichhia te hriselna lama hmalak dan tur tha nia a hriatte a sawipui a ni.

Loneitu, NLUP hnuaia tanpuina dawngtute leh kumina tuklawr lo vata hma la mekte kawmna pawh Secretary hian a nei nghal a, kum tina lo hal ngai tawh lo tura ruahmanna siam dan tur tha nia a hriatte sawiin chutiang tura ruahmanna chu Central lam atanga chak zawka kalpui a nih tur thu a sawi bawk. Loneitute chuan NLUP hnuaia an trade thlan te, tun dinhmunah chhawr mai theih rihloh, kum li kum nga vel mamawh chi an thlan avanga vawiina lo la nei mai an nih thu an hrilh a, an huan thlaite an puitlin hun chuan tlangram loneih an bansan vek tur thu Secretary hi an lo hrilh a ni.

Hei bakah hian Secretary hian Upper Saikah Primary School a tlawh bawk a, zirlai naupangte chu kawmin an dinhmun leh an mamawh nia a hriatte a en sak bawk.

Secretary hi Additional DC Pu R. Lalsangluaia, Lawngtlai SP Pu Lalringdika leh LADC Planning Board Vice Chairman Pu Hmunhre bakah Officer engemaw zatin an tawiawm a, Lawngtlai leh a chhehvel a a tih turte a tih zawh hnu hian Aizawl lam a pan nghal a ni.

Attachment

  • Loading attachment...