Vawiin chawhma ah khan Aizawl District Deputy Commissioner Dr. Franklin Laltinkhuma chuan ama Office ah Political Party hrang hrang aiawh-te, NGO hruaitute leh chanchinbumite kawm in Aizawl District Village Council Electoral Rolls, 2015 Final Electoral Roll leh Aizawl District Local Council Draft Electoral Roll, 2015 a tarchhuak a. Aizawl Local Council Final Electoral Roll hi Election Calendar ang chuan 27.02.2015 ah peihfel hman tura ruahman a ni.
Aizawl DC Dr. Franklin Laltinkhuma chuan Village Council Roll leh Local Council Roll te hi MLA/MP election a hman thin nen a in an thin thu sawiin tunah erawh chuan dan in a phut anga tih danglam a ni a ti a. Dan in a phut ang in VC/Local Council Roll atang hian non-tribal te chu paih an nih thu a sawi a, MLA leh MP ah erawh vote an thlak chhunzawn theih tur thu a sawi bawk. District Election Officer Dr.Franklin Laltinkhuma chuan Revision of Village Council Electoral Rolls, 2015 tluang tak leh hlawhtling taka neih a nih theih nana rim tak leh thahnemngai taka thawktu, ERO, AERO, Village Level Officers (VLOs), Village Council te, Political Party te leh NGO hrang hrang te, Media te leh Sawrkar Department hrang hrang te hnenah lawmthu sawiin Aizawl District Local Council Electoral Roll Revision , 2015 an kalpui mek ah pawh tawiawm chhunzawm turin a sawm a ni.
Aizawl District Village Council Electoral Rolls, 2015 Final Electoral Roll in a tarlan dan chuan - Voters tlemna ber, Chhanchhuahna Khawpui voters 100 awmna ah mipa 56 leh hmeichhia 44 an awm a .
Voters tamna ber, Sihphir Village Council huam chhung 2793 voters awmna ah mipa 1348 leh hmeichhia 1445 an awm thung a ni. Aizawl District Village Council Electoral Roll ah hian vote thlak thei 71014 zingah mipa 35292 leh hmeichhia 35722 vote thlak thei te an ni.
Summary Revision of Local Council Electoral Roll 2015, Aizawl Municipality Ward 19 chhunga neih tur ah hian Municipal Electoral Registration Officer(MERO) atan Officer Senior 4 leh Officer Junior 8 ruat an ni Anni pui tur hian Zirtirtu leh Sawrkar hnathawk Department hrang hrang a mite chu Locality Level Officer atan ruat an ni bawk. Local Council Electoral Roll Revision neih turah hian hun a tlem avangin State Election Commission, Mizoram thuchhuah angin inthun belh theih a ni dawn lova, engemaw avanga hming paihchhuah ngai te erawhchu Locality Level Standing Committee ( Recognised Political Party awiawh leh NGO ( MUP, YMA, MHIP) te telna) ten MERO/AMERO kaihhruaina hnuaiah enfiahin a tul angin hma an lak a ni ang.
