Vawiin chawhma dar 11 khan Horticulture Conference Hall-ah ‘Unique Education Society’ Delhi a kal tura thlante tan sawizauna ‘briefing’ neih a ni a, Labour, Employment & Industrial Training Department leh Mizoram Youth Commission te tangkawp buatsaih a ni.
Khuallian Pu K. Vally, Jt. Director, Labour & Employment leh Industrial Training chuan India ram sorkar hian Mission/Vision a neih zingah thalaite eizawnna tur chherchhuah a hmasawnna tur relbawl hi a tum anih thu sawiin India ram leh Mizoram hmasawnna kal mekah ram leilung faten eizawnna tlak a thiamna tak tak an neih theih nan hetiang training hi buatsaih a ni thin, a ti a. Delhi bakah Mizoram pawh lama training tura tirh chhuah an nih thin avangin state hrang hranga khawsak dan a in an loh na ah in siam rem thiam tur leh hrethiama khawsak pui thei turin Pu Valley chuan a chah a. Mizote aiawh an nihna ah pakhat mawi lohah hnam pum ti hmingchhe thei an nih avangin nun uluk a fimkhur thiam turin a ngen a. Thalaite hmakhua haina turah Mizoram sorkar a in hawngin ngaihtuahna pawh a seng a, kal man, eiman leh awmna tur mante ngaihtuahsak vel a ni tiin training tawpah exam tur an nih avangin syllabus te thiam tur leh tumruhna leh taimakna nen a zir turin fuihna tha tak a sawi.
He programme kaihruaitu Dr. JT Vanlalngheta, Secretary, Mizoram Youth Commission chuan training hrim hrim hi thil nuamsa leh awlai a ni lova, enge kan zir a, enge kan tum tih thlir chian a ngaih thu leh hriattur pawimawh tha tak a sawi bawk.
Unique Education Society ah hian 1st Batch November, 2014 khan mi 52 an lo kal tawh a ni. Tuna kalte hi 2nd Batch niin mi 90 an kal leh a ni. Unique Education Society, Delhi ah hian heng course hrang hrang : web design, tally leh banking & accounting te a training theih a ni. He hun ah hian Pu Lalmalsawma, District Employment Officer, Aizawl District chuan lawmthu sawina hun a hmang bawk a ni.
