Vawiin khan India rampuma rualbanlo nu leh pate intelkhawmna PARIVAAR-The National Confederation of Parents’Organisation chuan North East Regional Parents Meet vawi 5-na Synod Conference Centre, Aizawlah hmangin Social Welfare changtu Parliamentary Secretary Pu K.Lalrinthanga chu khuallian a ni.
Pu K.Lalrinthanga chuan rualbanlote tana thahnemngai taka thawktu PARIVAAR fakin rualbanloten an chanvo dik tak an chan a, sawrkarin hamthatna a pekte a taka an dawn ngei theih nana tan an laknaah lawmawm a ti a, sawrkar laipuiah pawh rualbanlote tan hamthatna an nawr chhuak thin chu chhuanawm a tih thu a sawi. Parliamentary Secretary chuan Mizorama rualbanlote tana thawktu Spastic Society te an din tirh atangin tha thlah hauh lovin rualbanlote tan hna an thawk a, rualbanloten enkawltu tha an neih phah mai bakah khawtlang mipuite pawhin rualbanlote chungchangah hriatzauna kan neih theih phah a ni, a ti a. An mamawhna te hriain sawrkar chuan he society tan hian Brigade area-ah hmun nghet a pe a, sum mamawh pawh sawrkar chuan dilpuiin North Eastern Council (NEC) atangin engemawzat an hmu tawh a, school building tha tak an neih thuai a beisei thu he hunah hian a sawi bawk a ni.
Hmarchhak huap rualbanlo nu leh pate intawhkhawmna hi Spastic Society of Mizoram chuan an thleng a. Kumin thupui atan ‘Towards Rights Regime’ tih an hmang a ni. He meet hi ni hnih chhung awh tur niin hmar chhak state hrang hrang atangin palai an kalkhawm a. Meet hawnna inkhawm hi Spastic Society of Mizoram Executive Member Pu V.Tochhawng IRS (Rtd.) chuan kaihruaiin PARIVAAR Executive Committee member Pi Neihtluangi’n he Regional Parents Meet neih mek chungchang sawi hawnna hun a hmang. PARIVAAR President kalchhuak Lt.Col. V.K.Gautam leh National Institute for the Empowerment with Intellectual Disability (NIEPID) aiawhin thu an sawi bawk.
India sawrkar chuan rualbanlote hamthatna turin dan tha tak tak a siam a. Amaherawhchu rualbanlo, a bik takin rilru lama rualbanlote hian heng hamthatnate hi anmahniin an haichhuak thei lova, tanpuitu an mamawh a. Kum 1999 khan PARIVAAR pawl hi ding tanin rualbanlote tana hamthatna haichhuahsaktu leh sawrkarin rualbanlote tana chanvo a siamsakte a dawng tur dik takte hnenah a thleng ngei em tih enzui a, nawrpuituah an tang a ni. Tun dinhmunah India ram pumah PARIVAAR zawmtu pawl 200 chuang zet an awm.
