Nimin khan Phulpui khua in Sports Centre ah “Kurtai Kut” ropui takin an hmang a, he hun hi Agriculture Minister Pu R.Lalzirliana chuan khuallian niin a hmanpui a, Parliamentary Secretary (Agri.) Lt.Co. Z.S. Zuala, Parliamentary Secretary (Finance),  bialtu MLA ni bawk Pu KS Thanga leh NLUP Implementing Board Vice-Chairman Pu PL Thanga te Khualzahawm an ni. 

Khuallian Pu R.Lalzirliana chuan kuthnathawktu fapa anih avangin kuthnathawktute rilru leh thawhrimzia a hriatpuia, an hlimna leh lawmna pawh a hriatthiampui hle tih Kut hmang tura mipui kalkhawm hmaah a sawi a, a tlangval laiin Phulpui khaw ho fu huan sanghalin a tihchhiatsak tur vengin a ramriak thin tih sawiin tun thlenga fu an la ching chhunzawm zel leh an hlawhtlinpui chho zel chu lawmawm a tih thu a sawi a, an khawtlang tanrualna rah ni a a hriat thu leh taimakna rah ni a a hriat thu a sawi bawk. NLUP chungchang sawilangin a thlawna sem anih loh zia chu a dawngtu *(beneficiary) ten an hrechiang ber ani a ti a, NLUP tanpuina chu sem anih hma in pawisa hmanna tur uluk taka ruahman fel sa thlap a ni a, lo vahna, lei laihna, hlawhfa rawihna, thlai chi leina etc. te niin hnathawhna tur a ni a, tha leh zung pawh an seng a ni a ti a, mipuite harsatbna leh tanpui an ngaih zia an hriatchian em avangin an dinhmun dawm kang tur chuan a bulthut (grassroot-level) atang hma lak a ngai a, chumi atan chuan NLUP pawh hi ruahman ani a ti bawk. 

Khuallian hian hel chungchang sawilangin engtik lai mahin hel ho a duhsak ngailova, a um theihna zawng zawngah a umzui zawk thin a ti a, remna leh muanna kan ramin a neih hi kan hmasawnna atan a pawimawh em em a chumi humhim tur chuan theihtawpin tan an la tih a sawi bawk. 

Phulpui chhulchhuak Lt.Col. ZS Zuala, Parliamentary Secretary pawhin thu sawiin fu huan enkawl hautakzia ngaihtuahin Phulpui khua in heti taka an hlawhtlinpui thei hian khaw taima an nihzia a tarlang tel a ni a ti a, an thawh rah senga “Kurtai Kut” an buatsaih thei chu ropui a tih thu leh a lawmpui thu a sawi a ni. 

Bialtu MLA, Pu KS Thanga, Parliamentary Secretary pawhin Phulpui khua chu mihring awm zat atanga chhutin Mizoram pumah fu ching nasa ber khua an ni a ti a, an hlawhtlinna lawmna programme an buatsaih chu a lawmpui thu a sawi a, Phulpui khua in kurtai dahthat dan an thiam a fur lai pawha kurtai hralh theia an la awm thin chu fakawm a tih thu sawiin Zoram pumah hming an chher mek a, hetah hian Sawrkar nen thawhho an thiam zel a pawimawh a nia  ti bawk. Link road engemawzat laih sak an nih tawh bakah an mamawh dangte pawh ngaihtuah sak a hma lak sak zel a inhuam thu sawiin Phulpui Sports Complex sak chhunzawmna tur pawisa pawh a awm tawh thu leh hna thawh chhunzawm thuai anih a beisei thu a sawi a, heng bakah hian bial chhung hmasawnna tura hna thawh lai mek leh hmachhawp hrang hrang sawilangin a bial chhunga Community Hall la neilo khaw pasarih te pawh Community Hall neih tir vek tumin hma a la tih a sawi bawk a ni. 

NLUP Implementing Board (NIB) Vice Chairman Pu PL Thanga pawhin thusawiin Phulpui khua chu Sawrkar Policy tihlawhtlingtu khaw chhuanawm tak an ni a ti a, “One Village, One Crop” tihlawhtlingtu khaw chhuanawm tak an ni a ti bawk. NIB mithiam ten an khaw dinhmun an zirchian tuma target an hisap sak aia tam an tharchhuak tih pawh sawilangin Bialtu MLA, Agriculture Department leh khawtlang mipuite thawhhona tha tak rah chhuah ani tiin lawmthu a sawi bawk a ni. 

Phulpui khuaah hian In 220 awmin heng zinga In 133 (60.45%) chuan fu huan siami9n ei an zawng a, an fu huan neih zawng zawng zau zawng hi Tin 240 hmun niin fu huan siam belhna tur ram an la ngah thu khawtlang hruaituten an sawi a, Tin khat hmun atang hian chhuan 50 vel an thar thin a chu chu kurtai kg 20,000 vel a ni a, kum khata an thar chhuah hi pawisa a chantirin Rs. 3,36,00,000/- vel ani thin a ni. 

Khawtlang hruaitute sawi danin an hriattheih chinah fu huan siam hmasa ber chu zirtirtu hmasa Dorikhuma (Lt. Col. ZS Zuala pu) niin kum 1903-1924 inkarah fu huan a siam a, mumal taka fu huan eizawnna atana hmang an hriattheih hmasak ber chu Pu Lalhmingthanga (L) leh Pu Rochhawnlova (L) te niin kum 1948 khan lal Kamliana hnenah fu huan siam an dil a, Lal chuan fu her apianga kurtai ser khat pe ziah tura lo tiin a remtihsak a ni. Fu hi Bawng leh Diesel khawl hmangin an her a, Mizoram sawrkarin flagship programme a NLUP kaltlanga fu huan te thlan theih a a siam tak hnu ah fu huan nei pawh nasa takin an pung a, kum 2013 khan fu huan siam pawl “Sugarcane Growers’ Society” an din hial a ni. 

Nimin Kurtai Kut hi Phulpui khaw mipui bakah Phulpui khawchhuak hmun hrang hrang ami te, Phulpui khaw thenawm ten an chhim a, Agriculture Department, NLUP Implementing Board leh thuthar thehdarhtuten an hmanpui bawk a ni.