No.44/2021-2022

Aizawl, 7th April,2021 : Vawiin khan Home Minister Pu Lalchamliana chuan ‘Zolitics Indian Polity and Governance’ tih lehkhabu Lalduhthlana, B.A(VI Sem)zirlai ziah chu Aizawl Tourist Lodge-ah a tlangzarh.

Lehkhabu tlangzarh inkhawmah thu sawiin Pu Chama chuan Mizo te hi hnam anga intodelh a, ding chhuak tura thil pawimawh ber chu ngaihhlut zawng(value system)dik neih nia a hriat thu a sawi a. Kum 1960 a mithiam ten ram pahnih, kawng hrang hranga dinhmun inchen tak, South Korea leh Ghanna ram te an zir bingna atangin South Korea chuan inremchenna te, thawhrimna te, zirna te sakhua nghet taka vawn te chu an ngaihhlut zawng leh an hnam nunphungah an neih laiin Ghanna chuan a ngaihhlut zawng a dang a. Kum 30 a vei meuh chuan S.Korea chu khawvel ram changkang 15 ah an tel phak tawh laiin Ghanna chu khawvel ram hmasawn za hnuai lamah an awm a ni, a ti a. Mizo te pawhin inrenchemna, thawhrimna, zirna ngaih pawimawh leh eng sakhua pawh bia ila, nghet tak vawn te chu hnam nunphung ah nei ila a duh thu sawiin lehkhabu ziaktu Lalduhthlana, B.A zirlai naupang te in lehkhabu rotling leh belhchian dawl tak a buatsaih thei chu a thawhrimna fakin scholar puitling ni ngei tura inchher chho zel turin duhsakna a hlan a. Mizo mipui te tan sorkar kalphung te, state sorkar leh central sorkar inlaichin dan te India ram innghahna Dan bulpui Constitution ah eng nge awm tih te hre chiang turin he lehkhabu hi a tangkai hle dawn a ni, a ti.

He lehkhabu ah hian phek 553 lai awmin bung 35 ah then a ni a. Lehkhabu tlangzarh inkhawm hi Pu Lalnghinghlova Hmar in a kaihruai a. Lalruatdiki Hmar, Asst.Professor, Govt. Johnson College in lehkhabu chhungthu sawi hawnna hun a hmang a ni.