No.43/2021-2022

Lunglei the 7th April 2021 - Vawiin chawhnu khan Lunglei District Road Protection Squad chu an Chairman Lunglei DC Pu Kulothungan A hovin a office chamber-ah an thukhawm. Lunglei khawpui chhung kawng humhalh chungchang leh mipui te an lo him zawk theihna tura hmalak dan tur sawiho a ni.

Meeting-ah hian a kaihhnawih Department hrang hrang official-te telin member thar ruat belh an ni a, tlawmngai pawl leh khawtlang hruaitute zau zawka thawhpui ni se tih rel a ni bawk. Meeting kaihruaitu Pu Kulothungan A chuan Lunglei khawpui thang zelah kawng humhalh tura tan lak a hun takzet a ni tiin mipuiten kawng humhalh a tul zia an hriata an zawm theih nan awareness campaign leh inspection uar taka kalpui chhoh a tul a ni, a ti.

Lunglei khawpui chhungah Inspection ngawrh taka kalpui ni se tih meeting chuan relin PWD atangin hemi hna nitina thawk turin mi pakhat ruat ni se tih rel a ni a. Hemi bakah hian District Road Protection Squad chuan thla tin inspection neiin Lunglei khawpui chhunga vantlang kawng nek chep, tuiluankawr chhia, kawngpui dunga in sakna bungrua dah, parking phal lohna a motor hun, kawngpuia tui/thli luan tir etc te an enfiah anga, a tul angin action an la dawn a ni. Heng hmalaknate hi tlawmngai pawl leh khawtlang hruaitute rawn chunga kalpui zel tur niin a tul anga hnatlang te pawh koh thin ni se tih meeting chuan a rel bawk.