No.42/2021-2022

Aizawl, 7th April, 2021 : Health Minister Dr. R. Lalthangliana'n vawiin chawhnu khan a pisaah khawtlang hruaitute leh kohhran hruaitute kawmin COVID-19 second wave lo thawk mek laka Mizoram leh kan khawtlang a him theihna tur a sawipui a, he hunah hian Mizoram Kohhran Hruaitute Committee (MKHC), Jt. NGO Coordination Committee, Mizoram Village Council Association leh Aizawl City Local Council Association aiawhte an tel a. Health Department Secretary, DM&R Secretary leh State Nodal Officer on COVID-19 te an tel bawk a ni.

Minister chuan COVID-19 vanga Mizoramin hun khirh tak a hmachhawn laia Zoram dung leh vanga Local/Village Level Task Force zawng zawng ten sum leh pai mai bakah, tha leh zung senga tlawmngaihna nena theihtawp an chhuahnaah lawmthu sawiin, kan zavaia kan tan tlan avangin India rama State zawng zawng zinga a tuar nep ber leh dinhmun tha bera awm thei kan ni a, khawvel hriata Mizoram tihmingthatute an ni, tih a sawi a ni.

Minister chuan nikum kum tawp lam leh kumin kum tir lamah kan dinhmun a ziaawm chhoh em avangin inkhuahkhirhna pawh kan thlahdul hret hret a, mipuite pawh kan ngaih a thain kan inthlahdul mek nia a lan lai hian India ramah COVID-19 hrik (variant) thar lo thawk lehin mithiamte pawh an mangang hle mai a, March thla tawp lam atang phei chuan Mizoramah pawh positive kan pung chak leh ta a, April thla kar khat chhung ringawt pawhin positive thar mi 32 kan han nei ta hial a, an zinga a tam zawk hi ram pawn atanga rawn haw an nih zui avangin kan dinhmun hi eng ang chiah nge a nih tih pawh hriatthiam a har rih hle a ni, a ti a. Hengte avang hian Village/Local Task Force, Kohhran leh Tlawmngai pawlte pawhin kan boruak a chhiat zel loh nan a rang thei ang berin engtin nge hma kan lo lak ang tih hi kan ngaihtuah a tul takzet a ni, a ti a. Mizoram mai kan ni lova, India ram leh khawvel ram hrang hrangte an buai leh mek lai hian chi-ai tur erawh kan ni lova, a hma anga theihtawp chhuaha kan tan tlan leh chuan kan hlawhtling leh ngeiin ka ring tlat a ni, tiin kalkhawmte chu tan lak thar leh puiah a sawm a ni.

State Nodal officer on COVID-19 Dr. Pachuau Lalmalsawma pawhin India ramah hian khawvela COVID-19 natna hrik rawn chhuak thar U.K. (B.1.1.7) variant, South African (B.1.351) variant leh Brazilian (P.1) variant te pawh hmuhchhuah tawh niin, double mutation pawh a awm tawh nia hriat a ni a, he hrik thar hi a symptom pawh a danglam deuh niin hriat a ni a, mithiamten an zirchiang mek a ni, a ti a. Second wave a hri rawn leng hi abik takin thalaite zingah a darh chakin thihpui pawh a hma aiin an tam a, inkaichhawn pawh a awlsam lehzual hle a ni, a ti a. Tun hunah hian a hma anga kan sahimna tura kan inbuatsaih ran a ngai a ni, a ti.

Vawiin inkawmhona ah hian mipuite himna atana pawimawh nia an hriat thil chi hrang hrang an sawiho a, zan curfew chungchangte, inkhawm chungchangte leh infiamna hmun hawn chungchangte pawh sawilan niin, Myanmar atanga raltlante lo endik a tulzia pawh sawi a ni a, Mizoram luhka (entry point) hrang hrangah pawh uluk leh fimkhur lehzuala tan lak a ngai nia a lan thu sawilan a ni. Heng bakah hian Task Force ten an ngaimawh leh harsatna an tawh chi hrang hrangte pawh sawiho a ni a, State Executive Committee on State Disaster Management in SOP thar tur an ruahman thuai tur thu sawi niin, heng ruahmanna siam kawngah pawh khawtlang hruaitute leh kohhran hruaitute ngaihdan leh finchhuahnate a tangkai thin thu leh ngaih pawimawh thin a nih thu sawi a ni.

Village Council leh Local Council inthlan zawh hlim a nih avangin khua leh veng tam takah hruaitu thar an awm thu sawi niin, Task Force te tihtur leh mawhphurhnate pawh a thara inhrilhfiah leh a tul thu tarlan a ni a, heng hi sawrkar thuneituten a tul angin an lo bawhzui dawn a ni.

Health Minister chuan Task Force te chu kan tha tichaktu leh police te nen pawh inthlawp tha tak an nih thin vanga lawmawm a tih thu sawiin, tun dinhmunah kan puan ven sawi chhinga kan khawtlang himna tur tan kan lak thar leh a ngai dawn a ni, a ti a. A tul ang anga anmahni phak chin chinah lo inbuatsaihin tan lo la thar leh turin a ngen a, sawrkar pawhin awmze nei leh felfai takin hma a la chhunzawm zel dawn a ni, a ti.