No.41/2021-2022

Aizawl, 7th April, 2021: Vawiin khan Art & Culture Minister Pu R.Lalzirliana chuan Mizoram State Museum, Aizawlah internet kaltlanga museum bungraw vawnthat leh mipui hmuha pholan a nih theihna tura hmalakna Digitization of Museum Objects a hawng.

Pu R.Lalzirliana chuan Art & Culture Department chu hnam kan ral loh nana humhalhtu ropui tak, hnam rohlu kan neih te a taka vawnga dahthatu an ni a, hnam thil tak tak khawihtu an nih avangin ram leh hnam tan an hlu hle a ni, a ti. Museum-a bungruate tunlai thiamna hmanga vawn that leh phochhuah a ni tur chu hmasawnna ropui tak nia a hriat thu Art & Culture Minister chuan a sawi a. Hmasawnna rahbi thar kai thei tura theihtawp chhuaha mahni zawn theuha mawhphurhna tha taka hlen tu, thawktute inpekna lawmawm a tih thu a sawi a ni.

Sawrkar laipui Ministry of Electronics and Information Technology hnuaia Centre for Development of Advance Computing (CDAC) leh Ministry of Culture tangkawpin India rama hmarchhak state hrang hranga museum ten an bungrua mipui hmuh theih tura internet kaltlanga an phochhuah theih nan leh digital hmanga vawnthat nan northeastheritage.in, museum portal buatsaih a, hetah hian Mizoram State Museum pawh a tel a. Mizoram State Museum hian tunah hian bungrua 26 a thehlut tawh a ni. CDAC chuan Mizoramah digitization of museum objects a taka kalpui a nih theih nan Mizoram tan cheng nuai 4.5 hu bungrua a rawn thawn a. CDAC vek hian JATAN 3D Museum Builder Software leh Accession Register Software a buatsaih sak bawk a. He software ah hian museum bungrua zawng zawng thun luh a ni dawn a, museum object vawnhim nan leh mamawhtuten awlsam taka an en theihna tur atana ruahman a ni.

Mizoram State Museum-ah hian bungrua 3890 a awm mek a. Gallery hrang hranga showcase 107-ah bungrua 706 pho chhuakin a bak zawng hi Reserve Collection room-ah vawn that a ni. Museum tlawhtu hi kum tin chawhrualin mi 12,544 vel an awm thin a, chawhrualin kum khatah cheng 38,500 vel sawrkar sumbawmah an chhunglut thin. Kum 2020-2021 chhung erawh hi chuan COVID-19 hripui leng avangin museum an hawng mumal thei lova, an hawn chhunah pawh tlawhtu an nei fumfe rih lo a ni.

Hawnna inkhawm tawi buatsaihah hian Art & Culture Director Pu R.Hmingthanzuala chu Chairman a ni a. Museum Curator Pi PC Zosangpuii’n technical report a pe a. Research Investigator Pu B.Lalzawmliana’n Digitisation of Museum Objects hnathawh dan chipchiar takin a hrilhfiah a ni.

Program neih zawh hnu hian Minister Pu R.Lalzirliana chuan Mizoram State Museum a fang nghal a ni.