No.40/2021-2022

Dated Serchhip, the 7th April, 2021: Vawiin hian AH & Vety Department, Serchhip District chuan hmun dang atanga ran lakluh leh hri leng thut thei laka inven dan tur inzirna hun an buatsaih.

He hunah hian Dr. Thangzadinga, CVO chuan, tunlaiin hmun thenkhatah vawk pul hri a leng mek a, mahse African Swine Fever a ni ngei em hriat a la ni lo thung. Kan district chhungah vawk pul hri lo leng ve palhin, African Swine Fever natna a ni tih finfiah lo ni ta se, hun rei tak chhung sa lam kaihhnawih kan thawn chhuak thei dawn lova, kan eizawnna in nasa takin a tuar dawn a, chumi a thlen loh nan chuan hmalak a tul a ni, a ti. Hmun dang atanga ran lo lut tur venna kawngah hian kan zavaia kan tan tlan a tul a, tuna hmun danga hri leng mek hi kan district chhunga lo lut ve lo hram tura kan beih a tul hle a ni, tiin inven a tul zia leh mitinin mawhphurhna kan neih theuh thu a tarlang a, Department lam pawhin kan him theih nana theihtawp an chhuah zel tur thu sawiin, mipuite chu thawhpuiah a sawm a ni. African Swine Fever chungchang sawifiahin, he natna vei chu za ah za an thi a, vanneih thuah damchhuak an lo awm anih pawhin natna kengdarhtu an ni tawh mai a, chuvangin kan district ah alo lut palh ang tih a hlauhawm a, Vaccine a awm lova, damdawi a awm hran lo bawk a ni a ti.

Dr. H. Vanlalrawna, VO chuan African Swine Fever laka inven dan tur chungchang sawiin hmun dang atanga ran lakluh rih miah loh te, ran inah a enkawltute pawh inkal pawh loh a that zawk thute sawiin, damdawi hmanga ran in leh a vel te silfai thin a that thu a sawi a. Ran damlo reng reng chu hralh emaw talh loh tur niin, ran thi chu paih mai lova thuk taka chinai nen phum thin tur a ni a ti. Ran thi an awm in AH & Vety thawktute hriattir vat thin turin mipuite a chah bawk a ni.

He hun hi Dr.R. Lalmakthanga, Ditrict AH& Vety Officer chuan a kaihruai a, tunlaia hmun then khata vawk pul hri leng hi African Swine Fever ani mai ang tih an hlauhthawn thu a sawi a. Chutih rual chuan thil hrechiang lova rinthu lo sawi chiam lo turin mipuite a chah a. Tun dinhmunah Serchhip khaw chhungah chuan vawk pul hri vei an awm an hriat loh thu a sawi bawk.

He hunah hian Village Council hrang hrang aiawh te, Sub-headquarters YMA aiawhte, branch YMA aiawhte, ran vulhtu pawl leh Sa zuar Association aiawhte an tel a. Ran hri leng laka kan him theih nana hmalak dan tur sawi hona hun hman nghal a ni bawk a ni.