No.3362/2021-2022
Aizawl the 10th December, 2021 : Vawiin khan School Education Minister Pu Lalchhandam Ralte chuan Saipum Primary School- I kum 100 tlin (Centenary) lawmnaah thu sawiin hmasawnna tura ke penna hrang hrangah a pawimawh ber chu Zirna hi a ni a ti.
Khuallian Pu Lalchhandama Ralte chuan zirlaiten ztirtute atanga thiamna an hmuh leh an dawnte bakah thuawihna, taimakna, dawhtheihna, insumtheihna nen, Pathian tih chunga lehkha an zir phawt chuan hlawhtlinna an nei em em ang a ti.Tunlaiah Social Media a lo chak tawh hle a, hemi kawngah hian zirlaiten a tawk an hriat a, zirna tibahlah zawnga an khawih nasat chuan zirnaah hlawhtling loh a hlauhawm a, chuvang chuan zirna lama anmahni pui thei turin a tangkai zawngin hmang thiam turin a chah. Pu Lalchhandama Ralte chuan zirlai nu leh pa te chu an fate school-a zirna bakah in lama tih tur homework te lo en zui pui a, theihtawpa an faten thiamna an neih theih nan che chhuak turin a chah a. Khawtlang hruaitute (NGOs) chu zirlaite zirna tibuai thei zawnga, programme buatsaih thin lo turin a chah bawk. Sorkar chuan zirna hi a dah pawimawh em em a, hrileng avangin kum 2 chhung chu duh angin hna pawh a thawk chak thei lova, sum harsa chung chung pawhin kan ramin zirna tha a hmuh theih nan tiin sorlar chuan chak takin hma a la mek zel a, zirtirtu kawng chi hrang hrangin 2000 dawn lak an ni tawh a ni a ti. School Education Minister chuan Saipum Primary School-1 kum 100 tling tawh school building tha lo leh hlui tak chu a hmun hma tha tak ruahman hunah a thara sak that a tum thu a sawi bawk.
He hun hmanpuitu dang khualzahawm Bialtu MLA Pu Lalringsanga Ralte chuan thusawiin hun chep tak kara Saipum Primary School-1 Kum 100 tlinna lawmna programme fel fai taka an buatsaih theih chu fakawm a tih thu leh a buatsaihtu organising Committee chungah lawmthu a sawi a. Zirlai naupangte chu taima tak leh tumruh taka lehkha an zir chhoh chuan Saipum khua atang hian sorkar officer lian tam tak tak an chhuak thei a ni tih hria a thahnem ngai taka zirnaa tan la turin zirlai leh nu leh pa, NGO hruaitute chu a chah bawk. Pu Lalrinsanga Ralte hian Govt. Primary school Centenary puala Souvenir an buatsaih chu a tlangzarh sak bawk. School Education Minister Pu Lalchhandama Ralte chuan Saipum Primary School-1 te hi Football, Volleyball, Volleyball Net leh Water purifier a pe bawk.
Saipum Primary School-1 ah hian thawktu Zirtirtu 4 awm in Zirlai Naupang 142 an awm a. He Huna khuallian Pu Lalchhandama Ralte hi Pu James Lalrinchhana, School Education Director, Pu Lalhmachhuana, Jt. Director, School Education Department leh Officer dang ten an tawiawm a ni.
Saipum Primary School-1 Centenary lawmnaah hian he school a lo lut tawh te, khawtlang hruaitute leh zirlai naupangte an tel tha hle a, tlaiah Centenary lawmna ruai an kil ho a ni.
Attachment
- Loading attachment...
