No.3361/2021-2022

Aizawl, 10th December, 2021: Lead Bank, Champhai, Bank Branch hrang hrangte, Line Department A.H & Vety Department leh Fisheries Department-te tangkawpin an huaihawt, sangha leh ran vulhtuten KCC loan an hmelhriat theih nan leh hamthatna an dawn theihna kawnga inzirtirna, 'District Level KCC Camp' chu vawiin chawhnu dar 3 khan CHANEM Ground Floor, Champhaiah buatsaih a ni.

He hunah hian Banker leh Line Department Nodal Officer-te hnen atangin KCC Loan la tura inkaihhruaina leh a kalphungte inhrilhfiahna ngaihthlak a ni a. KCC Loan dil tumte chu loan rulh ngaipawimawh tur leh, a nihna ang ngeia hmanga hlawhtlinpui ngei tura chah an ni a. Bank loan a nih angin a ti tak tak lo tan leh rul thalo tan ngaihven loh a that thu leh, rintlak ngei tura hna thawk tura  chah an ni a. Rinawm taka thawk tur lo te chu hnawl an nih thin thute leh loan rul thate chu nakin zel thlenga pek nawn an inhuam thu Banker ten an tarlang a ni.

KCC Loan hi loneituten leirem an rah theih nana duan a ni a. A pung a tlem a, za zela 7 in a pung a, loan rulh hun chhunga rul thate lawmpui nan interest subvention za zela 3 a awm bawk a ni. KCC Loan a tam thei ang ber pek a nih theih nan Lead Bank, Line department leh Bank-te tangkawpin hma an la mek zel a. Nodal department leh Bank-ah te dilna thlen theih a ni a. KCC Loan cheng nuai khat leh singruk (Rs 1.6 lakh) chinah security leh guarantor a ngai lo a ni.

Financial year 2020-2021 chhung khan A.H & Vety  Department kaltlangin beneficiary 140 ten KCC Loan an dila, Department-in Scheme-te siam sakin an account neihna Bank-ah te an thawn a, Fisheries Department kaltlangin KCC loan beneficiary mi 6 an awm bawk.

District Level KCC Camp-ah hian sangha leh ran vulh lama tui mite leh KCC Loan la duh turte an kalkhawm a. KCC Loan dilna application form sem nghal niin, Mahila Shakti Kendra, Women Cell ten KCC Loan lak tum hmeichhiate tana hriatfiah awlsam turin KCC Loan chungchanga hriattur tul, Mizo tawnga lehlin chu an sem nghal bawk a ni.