No.3360/2021-2022

Aizawl the 10th December 2021: Vawiin chawhma khan State Level Sub Committee on Fire Prevention Committee chu an Chairman Pu TJ Lalnuntluanga, Minister, EF&CC Department hovin SAD Conference Hall-ah an thukhawm. He meeting-ah hian PuLiandawla, PCCF (HoD) & Principal Secretary, EF&CC Department leh Pu H.Lianmawia, CCF(P&D), Member Secretary bakah Department hrang hrang hotute leh NGO-te leh member-te an tel a ni.

He meeting-ah hian kum 2021 kum tira Mizoram in kangmei a tawrh nasat dan leh a nghawng hrang hrangte thlirho a ni a. Minister Pu TJ Lalnuntluanga chuan kumin kumtira harsatna kan tawhte thlirletin, kumthar lo awm tur atana ruahmanna tha tak neia lo inhma khua chu tha a tih thu a sawi a. Kan harsatna tawhte hrereng a, kum 2022 ?hal hmachhawn tura inpuahchahna tha tak neih a tul thu a sawi a ni.

State Level Sub Committee On Fire Prevention Committee vawiina thukhawm chuan kum 2022-ah Fire Prevention week chu 7th February atanga 12th February inkarah hmanni se tiin a rel a. Kum 2022 kangmei ven thupui (Theme) atan "Kangmei chhuaktur ven mitin mawhphurhna" tih chu thlan a ni a.

Kum danga tih thin dan ang bawkin, kum 2022 ah pawh kangmei ven kawnga ti thazual district pathum leh, district tina ti thazual khaw thum thlanchhuah thin chu kalpuini se tha tih a ni bawk a ni. Thupui / Lo hal hun ni hnu hnungber atan March ni 15 ni se. Hemi hnu lama lo hal emaw, bawhchhiate chu dan hmanga hrem an nih theih nan District thunei tuten ruahmanna siam se tiin rel a ni bawk a ni.