He thu hi  Law Minister leh Champhai South bialtu MLA nibawk Pu TJ Lalnuntluanga'n vawiina a bial chhung New Champhai, Zotlang leh Ruantlanga khawtlang mipuite mamawh leh harsatna thlente  Sawrkar Official-te nena an ngaihthlak sakna huna a sawi a ni.

Law and Judicial Minister chuan hmasawnna tluantling leh tlo nei thei turin rilru sukthlek siam dik hmasak angai a, chumi hnuah chuan hnasawnna ruhrel hna thawh tha takin a kalpui theih a ni, a ti a.  Ram dinhmun ngaihtuah chung zela mamawh dan indawt angin  rualkhai taka hmasawnna ruangam siam a pawimawh thu a sawi a. Mipuite chu Pathian leh kan ram tan tih thupui chu changchawi fo a, Pathianin  ram min pek hlu tak hi neitu rilru pu chunga enkawl tur leh    chhungkua  leh khawtlang tana rinawm taka hna thawh tum  theuh turin a chah a. Mipuite harsatna sutkian sak inhuama thahnemngai taka thawkchhuak  official-te a fak a, mamawh thlen te danin a phal ang zela tihhlawhtlin anih theihnana  bawhzui turin a chah a  ni.

Pu TJ Lalnuntluanga chuan Sawrkar department Office  dawr turin Champhai leh Aizawl te kal angai fo thin a, mipuite harsatna chhawk zangkhai tur leh tiziawm thei turin kawtkaiah  banphak maia Pisa hun hnaih a nih thu leh hlawkthlak  tak anih a beisei thu  a sawi a. Ram siam thatnan mipui leh sawrkar thawhho that angai a,  chumi tilanga tifiah turin vawiin hun hi hman a ni, a ti a. Minister chuan District Hospital Champhai tihchangtlung tuma hmalak  anih thu leh Zofate khawchhak lam thleng pawha an pan theih tur khawpa thuamthata,  mamawhtute tana awlsam taka hmanrua leh thawktu   pan theiha awm thei tura ngaihtuahna sen anih thu a sawi a. Inkalpawhna leh inbiakpawhna te bakah khawtlang mamawh angte pawh a tul ang zelin a tahtawla tihchangtlung zel anih tur thu a sawi bawk.

Minister chuan kalkhawmte  chu mahni tanghma chauh hai  lova, ramin engtin nge hma a sawn ang tih rilrua dah ran tur leh taihmakna, rinawmna leh dikna vuan tlat chunga  hnathawk  turin a chah a. Champhai leh a chhehvela chengte chu  Leilet phai hmingthang tak ' Rice Bowl of Mizoram',  Champhai tihmingthatu  thutchilhtu an nih angin chhawrtangkai a, taima leh rinawm taka thawk turin duhsakna a hlan a. Mipuite chu Sawrkar dinhmun hriaa Sawrkar zai ngai zel tur leh dawhtheihna nei  turin a chah  a. Sawrkar chu mipuite siam anih  angin mipuite ta ani a, ram leh hnam hmasawnna kawngah mipui leh sawrkar Official te inpawhtlang taka an thawhhona angaih thu a sawi a. Ram hmasawn leh entawntlak, intodelh din kawngah Mizoram  mipuite finchhuahna leh tawiawmna a ngen  a ni.

Vawiin Mipui leh Sawrkar inpawhtlang taka indawrna hmang hian harsatna leh mamawh thlente tih theih anih leh nih lohte tlang taka sawiho a ni a. Hmalak dan tur te leh kawng hmangte inhrilhhriata sawiho a ni bawk. Minister Pu TJ Lalnuntluanga hi  Pu Alexander V. Chongthu, Addl DC;  Pi Ethel Rothangpuii, PD DRDA;  Pu Francis Lalnuntluanga Ralte, Addl SP; Pu K.Lalhmuakliana, DLAO/DUDO; Pu Lalduhthlana, DFO;  Dr  R.Lalawmpuia, CMO; Pu C.Lalbiakzauva, DEO; Pu B. Lalbiakthuama, EE PWD; Pu J.Kapkima, EE PHE;  Pu Laldingliana Hrahsel, EE I≀ Pi Lucy Lalrinpuii, DFDO; Pi Rebecca Laldinmawii Hrahsel, BDO;  Pu Lallawmkima DIPRO;  Pu Lalremmawia Colney, SDAO; Pu Vanlalvuana Rokhum, SDHO; Pu Thanliana Hauhnar, RO ten an tawiawm a ni.