Thingsul Tlangnuam MHIP ten In an sak thar chu Home Minister Pu R. Lalzirliana’n vawiin chawhma dar 10:30 khan a hawng. Hawnna programme hi Tlangnuam Community Hall ah neih chhunzawm nghal a ni.

Kum 2015 atana programme hmasa berah Tlangnuam MHIP In sak thar hawngtu a nih avang leh lawmna lam programme a bul tan a ni chu lawmawm a tih thu sawiin khuallian Pu R. Lalzirliana, Home Minister chuan kum thar kan chuan kai mek lai hian kan hring nunah hunbi awm in hlim ni lawm ni lungngaih ni leh tah ni a awm thin. Mahse Pathian ringtu kan ni a, kumkhua in a ngai reng a awm thei kan ni lo, chhum te zing in ruah te sur mahse Ni eng mawi tak lo lang lehin boruak thiang tak kan hip leh thin tih hriaa hun thim a lo thlen pawh a pawngpaw in ngaihtuah kun reng lovin mual eng hmu phak in Pathian in min awmpui reng a ni tih hriaa nun uluk erawh a pawimawh in a tul a ni a ti.

Mizoram in hma kan sawn zelin sorkar inrelbawlna ah pawh a tha turah chuan huai taka kaltlang pui zel a ngai a ni tiin Pu R. Lalzirliana chuan tun krismas leh kumthar vuakvet ah pawh kum dang aia Aizawl leh a chhehvel ah te thil thleng tha lo leh fello a tlem zawk a ni a ti a. Mizo hmeichhia te kawng hrang hrangah mi chhuanawm tak tak leh sulsutu an pung zel a ni tunah chuan ‘Hmeichhe finin tuikhur ral a kai tawh’ tiin kan hma lawk a VC inthlan lo awm turah pawh kum nga term tur a nih avangin hmeichhe candidate tha chhawp chhuak ngei tura uluk taka ngaihtuah a ngai tawh a ni a ti bawk. Chutih rualin Bible thu kan hriat reng a, kan zawm a pawimawh a. Hmeichhe lu mipa mipa lu Krista tih anih avangin mipa te thlazar hnuaiah hmasawn zawnga ke pen a him a ni Pu Lalzirliana chuan a ti.

Central sorkar atanga thu lo kal bawhzui nan MP leh MLA te bial theuhva Model Village thlan turah ama bial ah chuan Thingsul Tlangnuam chu thlan a nih thu sawiin Minister chuan kan ram intodelh zel nan Agriculture a pawimawh a, Model Village entawntlak ni thei tur a kut hnathawktute nen tangrual tha in inlungrual a ngai a ni a ti a, kum tir atang hian kan rilru lo thianghlim in lungrual takin ke i pen ho ang u tiin kalkhawmte a sawm a ni.

Vawiin programme hi Pi Vanlalfimi, President MHIP in a kaihruai a. Pi Rochuangkimi Khenglawt in thu a sawi bawk.