State Institute of Rural Development & Panchayati Raj (SIRD&PR) leh Panchayat Mahila Shakti Abhiyan (PMSA) tangkawp chuan Aizawl Municipal Corporation (AMC) huamchhunga hmeichhe local council member te tan ni hnih awh tur "Leadership & Human Rights Training" an buatsaih chu vawiin khan SIRD&PR Auditorium, Durtlang Leitanah neih tan a ni a, Pu R.Lalzirliana, Rural Development Minister in a hmanpui.
He hunah hian Pu R.Lalzirliana chuan ram inrelbawlna a a fawng pawimawh chelh thei tur hmeichhia tam tak an awm a ni a ti a. Tun dinhmunah Mizoram pumah chhinchhiah danin hmeichhe Village Council member 828 awm mekin, AMC hnuaiah Local council member 143 an awm mek a ni a ti a. Hei hian politics mai nilo khawtlang leh ram inrelbawlna a hmeichhia te hmasawnna a entir a ni a ti a. Mipa emaw hmeichhia a ni emaw kan tih tur leh mawhphurhna hlenchhuah hi Gender Equality chu a ni tiin, hmasawn zel tura hmalak erawh kan mawhphurhna theuh a ni a ti bawk. Minister chuan sorkar laipuiin Panchayati Raj anga Village Council te kalpui tur a min tih ang leh Village Council neih mek te mawhphurhna keng teuh ringawt lova thuneihna tam zawk an neih theih nan hmalak mek a ni a ti a. Hmeichhe local council member training tura kalkhawmte ruat nilova mipui thlan tlin an ni tih inhria a, training a an zirtur te hlawkpui ngei turin duhsakna a hlan a ni.
Vawiin training hawnna inkhawm hi Pi Zothankimi, President PMSA in a kaihruai a, Mizoram State Commission for Women Chairman thar Pi M.Zohmingthangi leh AMC Councillor hmeichhia te an tel bawk a ni. PMSA hi hmeichhia vantlang roreltura thlan tlin insuihkhawm pawl niin, hmeichhia te ram inrelbawlna a zuang lut deuh deuh tura tichak a hmalak hi a tum a ni.
Training hi ni hnih awh tur niin, vawiin hian 'Gender issues in Mizoram:Problems & Prospects', 'Role of Women in Local Governance' leh 'Comparision of Panchayati Raj Institution & Village Councils' tih thupui hmangin Prof.Lalhnehzovi, Director, Women Studies Centre Mizoram University leh Pu Khuangthansanga Pakhuangte, Sr. Core Faculty (P.A) ten zirtirna an pe a. Naktuk hian Human Rights, Child Rights leh Women Rights tih thupui zirho leh a ni anga, Pi Vanramchhuangi, Social Activist leh Lalfamkimi, Advocate ten zirtirna an pe dawn a ni.
