No.2528/2021-2022

Aizawl, the 7th October, 2021: Azadi Ka Amrit Mahotsav hmalakna kal zelah vawiin khan Women & Child Development Department buatsaihin  Champhai Zotlang Field-ah  'Hmeichhiate himna, zahawmna leh chanvo'  tih thupui hmanga hun hman a ni a. He hunah hian mipa ten hmeichhiate tan theihthawp an chhuah a ni tih lantir tharna lam hawia program hman a ni.

He hun hi Pi Esther Leihang, SDC & Nodal Officer chuan hmanpuiin hmeichhiate dinhmun tlangpui a tarlang a. Women empowerment in a kawh ber chu hmeichhiate chawikan chiama mipate rahbeh tumna lam ni lovin, zirna, hna zawnna kawng leh kawng dang danga mipa tih ang hmeichhiaten an tih ve theihna tur a hmalakna a ni, a ti a. Hmeichhe zahawmna a mawhphurtu ber chu mipate an nih thu leh mipate chu tan la thara bultan thartu ni theuh turin a sawm nghal bawk.

Thusawitu dang Pu. Lalrinmuana, DPO Champhai chuan programme hman a nih chhan tlangpui a sawifiah a. Mipate mawhphurhna hrang hrang tarlangin a  hlenchhuaktu nih a pawimawh zia a tarlang bawk.

He hunah hian hmeichhiate humhim kawnga thutiam lakna neih a ni a. Mipa ten hmeichhiate tan theihthawp an chhuah mek a ni ti leh  theihtawp an chhuah zel dawn a ni tih lantir nan kalkhawm zinga mipa ten intlansiakna hun an hmang bawk. Pi. K.Lalrinfimi, Women Welfare Officer chuan lawmthu sawiin he hun hi a khar a ni.

Azadi Ka Amrit Mahotsav hmalakna hnuaiah  Women & Child Development Department Champhai chuan October ni 2 khan N.Diltlangah Champhai DC hovin hun an hmang a. October ni 6 khan Leithum leh Samthang tlawhin hun an hmang bawk. He hunah hian naupang hriselna, humhimna leh hmeichhiate dikna chanvo, intluktlanna lam hawi VC, MHIP, MUP leh Anganwadi Worker te zirtir an ni a.  Anganwadi Worker, Helper leh Beneficiary-te hnenah eitur tha ei pawimawhnate, naupang rilrem zawnga eitur tha siam dan kawng chi hrang hrang leh thlai tharte hmanga ei leh in hrisel  buatsaih dante zirtir an ni bawk.