No.2529/2021-2022
Aizawl Khuangchawi thla ni 7, 2021: Vawiin khan Lawngtlai District Task Force Immunisation (DTFI) chu an Chairman, Lawngtlai Bawrhsap Dr Andrew H. Vanlaldika hovin DC Conference Hall-ah an thu khawm a. Lawngtlai District-a COVID-19 hri danna (vaccine) leh hri danna dang (routine immunisation) chungchang an sawi ho.
He thut khawmah hian district administration, health department, police, I&PR, Lawngtlai khawpui chhunga VC, tlawmngai pawl, MJA leh kohhran hruaitu ai awhte an tel a. Member Secretary, District Immunisation Officer Dr S. Thaizi hnen atangin Lawngtlai District chhunga COVID-19 hri danna (1st dose leh 2nd dose) pek tawh dan report ngaihthlak a ni a. Hri danna pek chungchanga harsatna hrang hrang awmte leh tha zawk leh felfai zawka kalpui a nih theih nana rawtna hrang hrangte sawi ho zui nghal a ni.
January ni 19, 2021 atanga October ni 6, 2021 thlengin Lawngtlai District-ah COVID-19 vaccine 1st dose la tawh mi 48,524 an awm a, an zinga mi 20,797 te'n 2nd dose la tawhin, 2nd dose lak hmabak hi mi 27,727 an la awm a. Lawngtlai District headcount atanga kum 18 chung lam, vaccine la thei chin mi 75,894-ah vaccine lak hmabak mi 27,370 an la awm a, vaccine la tawh hi za zelah mi 63.9 ang a ni.
He thut khawmah hian Lawngtlai District-a vaccine la leh la lo tea COVID-19 hriin hna a thawh dan khaikhinna thlir ho a ni a. July - October, 2021 chhunga Lawngtlai District-a COVID-19 hri kai mi 586 zingah vaccine dose 1 tal la tawh mi 234 awmin, an zinga mi 72 chu full dose (dose 2) la tawh an ni a, vaccine la lo mi 352 an awm thung a. Hri kai za zelah vaccine la 39.9 leh vaccine la lo 60.1 awm ang an ni.
July - October, 2021 chhunga Lawngtlai District-a COVID-19 vanga thi mi 21 zingah mi 7 chu vaccine la tawh niin, vaccine full dose la mi 1 a awm a, mi 14 chu vaccine la lo an ni thung a. COVID-19 vanga thi mi za zelah vaccine la tawh mi 33.3 leh vaccine la lo mi 66.7 awm ang an ni.
COVID-19 damlo na zual, Lawngtlai Dedicated Covid Health Centre (DCHC)-a enkawl tawh mi 83 atanga chhutin, vaccine la mi 46 zingah nunna chan mi 3 awmin, vaccine la lo mi 37 zingah nunna chan mi 6 an awm thung a ni.
Attachment
- Loading attachment...
