Home Minister Pu R. Lalzirliana chuan sorkar hmalakna leh Police-te thawh that avangin tunah chuan Mizo hmeichhiaten hleilenna an tawhin an zualko ngam tawh a, hetiang an chunga diklohna thlengte hi zah vang emaw hlauh vang emawa zep chi a ni lova, hmeichhiate thlavang hi hauh sak tlat a ni zel ang, a ti. He thu hi vawiina Seling MHIP Branch-in kum 40-na Ruby Jubilee an lawmna a hmanpui naah a sawi a ni.

Home Minister chuan Mizo hmeichhiate dinhmun chu hmanlai pipute hunlai nen khaikhin chuan a tha tawh hle a, zirna lamah leh eizawnna kawngah pawh mipa aia titha leh thawk tha zawk an tam tawh hle a ni, a ti. Inneih leh inthen chungchangah pawh hmeichhiate chanvo leh dikna hum turin sorkarin dan felfai tak a siam thu leh, khawtlang inrelbawlna ah pawh state thenkhata an puitlin hleih theih loh Urban Local Bodies a hmeichhiate tana seat hauh sak chu Mizoramah kum engemawzah hman a nih tawh thu te sawiin, Minister chuan khawtlang inrelbawlnaa hmeichhia thlan tlin zawng zawngte tan training buatsaih turin hma lak mek a nih thu a tarlang.

India ram pumah hmeichhiate, naupang an ni emaw kum upa lam an ni emaw an chunga hleilenna lantirna a tam thu leh, Mizoramah ngei pawh hetiang ang case hi report a tam thu Home Minister chuan a sawi a. Mizoramah bik chuan heihi ruihhlo tam tak vang a ni tih chu hai rual loh ni mahse, kawng tam takah chuan Sorkar leh NGO ten hemi lamah hian inhrilhhriatna, awareness campaign te an buatsaih that avangin police leh Social Welfare lamah te in report ngam leh a nachang hria an tam ta a, case ziahluh zat pawh a pun phah ta a ni, a ti.

Minister Pu R. Lalzirliana chuan mi hlawhtling chhuanawm tak takte hian an kalna apiangah Mizo hming an titha thin a, chutihrual chuan mi tlemte avangin hnam pum state pum hmingchhiatna a thleng thei bawk tih hriat tel a pawimawh thu a sawi a. Chumi kawngah chuan MHIP pawhin hma la ve se a duh thu leh, hmeichhiate chu khawi hmunah pawh chhungkua, khawtlang leh ramah a ni emaw, inremna siamtu an ni thei tih hre reng a fing leh fel taka midang tanpuitu ni zel turin a chah a ni.

Vawiin Seling MHIP Branch Ruby Jubilee lawmna hi Seling YMA Run ah neih a ni a, Pu Lalchhanhima Chhangte, Pi RTC Lalduhawmi leh Pi T. Lalramsiami te hnenah khawtlang leh pawl tana an thawh that avangin chawimawina hlan niin, member thi tawhte sunna neih a ni bawk. MHIP Headquarters atangin an hruaitu thenkhat ten he hun hi telpuiin, Ruby Jubilee Souvenir chu MHIP Hqrs. President Pi Saipuii'n a tlangzarh sak a ni.