India hmarchhak state hrang hrang hospital-te zinga a vawikhatna leh India rampum hospital-te zinga  pahnihna ni turin Aizawl Civil Hospital (Aizawl East District Hospital) chu National Quality Assurance Certificate (NQAC) hlan a ni. Vawiin khan Aijal Club-ah NQAC hlanna inkhawm buatsaih niin Health Minister Pu Lal Thanzara chu khuallian a ni a, sawrkar laipui Ministry of Health & Family Welfare atangin Quality Improvement, Senior Consultant Dr Parminder Gautam leh Consultant Dr Deepika Sharma te an lokal bawk a ni.

Health Minister Pu Lal Thanzara chuan kumin chhunga a hmasa ber leh India rama pahnihna ni tura Aizawl Civil Hospital-in National Quality Assurance Certificate a dawng thei chu lawmawm tiin he certificate dawng tura tehfung khirh leh chipchiar tak an paltlang chu Hospital-a thawktu zawng zawngte thawh rah a ni, a ti. Ram chhung mipui tam zawkte hi hriselna kaihhnawihah sawrkarah an innghat nasa hle a, State leh Central sawrkar pawhin mipuite hriselna a ngai pawimawh a, rethei tak takte pawhin an ban phak sawrkar hospital-te hian hma an sawn zel theih nan tan a la a ni, a ti a. Kum 2013 atanga bul tanin heng sawrkar hospital-ten hma an sawn theih nan Quality Control leh Monitoring lam buaipui tan niin damdawiin thianghlim leh tha tehna National Quality Assurance Standard (NQAS) chu siam a ni a, tehfung khirh tak paltlang hnuah Aizawl Civil Hospital-in NQA Certificate a dawng thei chu Mizoram tan hlawhtlinna ropui tak a ni, Pu Lal Thanzara chuan a ti.

Khual zahawm, Health Secretary Pu Lalrinliana Fanai pawhin thu sawiin Aizawl Civil Hospital-in NQA Certificate a dawng chu ram tana thil chhinchhiah tlak a ni a, chona nasa tak siamtu a ni tel bawk, a ti. Secretary chuan Hospital tha leh thianghlim neihna kawngah Certificate dawn chu a bul tanna a ni a, NQA Certificate kawl reng tlak an nih theih nan thawktu zawng zawngte tan la turin a fuih a. District danga hospital te, Public Health Centre leh a dangte tan pawh NQAS Certificate dawng turin theihna an nei tih hria a tang sauh sauh turin a chah a ni.

Dr Parminder Gautam leh Dr Deepika Sharma te pawhin Mizoram an lawmpuizia sawiin hospital quality tha nei chhunzawm zel turin duhsakna an hlan a ni.

Aizawl Civil Hospital hi Kuli Dispensary tiin kum 1894 khan te tak te in a ding tan a. Kum 1896-ah khum pariat a nei a, hemi kum vek hian khum 12 neiin an ti lian hret a. Tunah chuan Indian Register Quality Systems pawhin hospital tha a ngaiin certificate of approval a pe a, Standard: ISO 9001:2008  a pha tawh nghe nghe a ni.

NQA Certificate nei thei tur hian November 2014 khan State Level leh District level ah Quality Assurance Committee din a ni a. Hemi kum vek hian State Quality Assurance Unit leh District Quality Assurance Unit din nghal a ni. Kum 2016 ah Sub Committee pahnih - State Family Planning Indemnity leh District Family Planning Indemnity din a ni leh a. Hmalakna bul tan nan Aizawl West, Aizawl East (Aizawl Civil Hospital) leh Lunglei Civil Hospital te thlan an ni. Training leh workshop hrang hrang te neih niin nasa taka an inbuatsaih hnuah Aizawl Civil Hospital chuan Internal Assessment hmasa ber chu June, 2015 ah paltlangin 68% an hmu a. Internal Assessment vawi lina January 15-16, 2016 a neih tumin 76% an hmu ta a. State level assement, March 2016 a neihah 78% hmuin National Level Assessment ah hemi kum vek April thlaa neihah 70% an hmu a. 70% hmu phalo department an awm avangin thla ruk chhung hun pek belh an nih hnuah November, 2016 khan he hospital hian 77% hmuin tehna a paltlang ta a. NQA Certificate hlan an ni ta a ni. He certificate hian sum fai cheng nuai 30 a keng tel a ni.