Vawiin khan Mizo Zaimi Inzawmkhawm (MZI) chuan Aizawl Civil Hospital-ah an 37th Rising Day puala Blood Donation Camp an huaihawt chu Health Minister Pu Lal Thanzara’n a hmanpui a. MZI President Pu Lalrinmawia Ralte, MLA bakah Aizawl Civil Hospital Medical Superintendent Dr. K. Lalremsanga leh Dy. Medical Superintendent Dr. John Zohmingthanga ten Minister an tawiawm a ni.

Khuallian Pu Lal Thanzara chuan MZI member zawngte Rising Day lawmna chibai bukin an din champha lawm nan mamawhte tana thisen pek an thlan chu a entawntlak hle a ni, a ti. Thisen hi a thlakna tur mithiamte’n an la hmuhchhuah loh avangin khawvelah kumtin mi maktaduai 112-in thisen an pe thin tih WHO chuan a tarlang a. India pawhin kumtin unit maktaduai 12 vel thisen a mamawh a, Mizoram-ah hian kumtin unit 25,000 vel mamawh thin a ni a. Mizoram vanneihna deuh chu India rama district engemawzat Blood Bank la awm lohna a awm laiin district 8 zawng zawngah Blood Bank hawn a ni tawh a, chu mai bakah Kohhran Blood Bank, Durtlang leh Serkawn-ah an nei bawk a. Heng Blood Banks 10 te hian theihtawpin mipui rawngbawlin thahnemngai takin hna an thawk thin a, a lawmawm hle a ni, a ti. Health Minister chuan Mizo thalaite leh tlawmngai pawl ten thisen pek an uar chu Mizoram vanneihna a ni a, kum 2016-2017 chhung khan thisen pete zingah mahni duhthu ngeia thisen pe (voluntary donors) chu zaa 83% niin a sang ber pawl a nih thu a sawiin Pu Lal Thanzara chuan damlote’n an mamawh ngawih ngawih thisen pekah hian tha thlah lovin tan la zel turin mi zawng zawng a sawm a. 

Thu a sawi zelnaah Khuallian chuan MSACS lamin theihtawp an chhuah chhoh zel chu rawn ti changtlung turin Health Directorate-ah National Health Mission hnuaiah State Blood Cell din a ni tawh tih a sawi a. Blood Banks hrang hrang tih changtlun nan NHM kaltlang hian equipments engemaw zat an lei tawh a - Civil Hospital Aizawl-ah Blood Collection & Transportation Van tha tak pek a ni a; Lunglei-ah thisen thliar hranna dah tura hmalak mek a ni a, hei hi Lunglei district bakah Lawngtlai leh Siaha district thlenga an chhawr theih beisei a ni, a ti. MZI chuan an member-te chhiatni thatnia an intawiawm thin chu a entawntlak hle a, mamawhte tanpui nana tun hnaiah CM Relief Fund-ah cheng nuai 1 an chhunluh-ah lawmthu a sawi. 

MZI President Pu Lalrinmawia Ralte pawhin thusawiin pawl reng reng din chhan ber chu midangte tana malsawmna nih a ni a, chuvangin MZI pawhin Rising Day lawmna chi khat atan thisen pek an thlang ta a ni, a ti a. NEC chuan Mizo thalaite zinga zai leh rimawi lama talent thar haichhuah leh phochhuah nan leh Champhai-a zai kut buatsaihna tur cheng nuai 10 MZI hnenah a rawn phalsak tawh a, hemi hunah hian zairimawi ngainatu a duh apiang tan tel theih a nih dawn a ni, a ti bawk.

MZI 37th Rising Day Blood Donation Camp inkhawmah hian Mizo zinga thisen pe hnem ber - mipa-ah Lalremruata (65 units) leh hmeichhia-ah Rebecca Saimawii (56 units) te hnenah Khuallian hian chawimawina Certificate a hlan nghal a. Aizawl-a an lawmna rual hian Lunglei leh Champhai-a MZI Headquarters member-te chuan Blood Donation Camp an nei ve ve a, Champhai MZI Headquarters te chuan khawtlang tihfai hnatlang an nei bawk a ni.