Vawiin chawhma khan Health Minister Pu Lal Thanzara chuan Synod Conference Centre-ah Health Multi Purpose Service Association khawmpui lian vawi 34-na hmanpuiin Mizoram hmunkilkhawr apiangah Health Department hnathawkte mamawhna a nasa tih a sawi a. Hmun kilkhawr tak taka cheng mek hrisellohna avanga manganna te mamawhna chu Health Department a thawk tih atana mawi, rawngbawlna rilru nena chhan a ngai a ti.

Health Minister Pu Lal Thanzara chuan Health Multi Purpose staff te chu Health Department hmalakna zawng zawng - a lianber atanga a te ber thlenga mipuiin an dawnsawn theihna tura thawktu pawimawh ber zinga mi leh hmun tam zawkah phei chuan hriselna chungchangah mipui in nitin an biakrawn thin an ni a. Health Department innghahna lungphum pawimawh tak, an hnathawh vanga infant Mortality Rate(IMR) pawh hniam thin leh hna pawimawh inthlahdah thianglo an ni a ti a. An awmna hmun apiangah te vantlang hriathlawh an nih thin thu sawiin vantlang hriatloh khawpa inthlahdah an ni tur a ni lo a ti. Damlo leh damlo chhungten damdawi ina hnathawkte atangin damdawi hmanga enkawlna chiah an beisei loh thu sawiin chhanna nem, hawihhawmna, thlamuanna leh lainatna nena dawnsawn an mamawh tel tih Health Department a thawk ten an hriat a ngai a ti a. Khawpuia insawn duh tam ta lutuk leh damdawi thiam mamawhna Mizoram hmunkilkhawr ber bera awm chho mek zel chu chinfel anih theih nan kawng dap mek zel a ni a ti a. Hnaruak hnawhkhah tur reng rengah pawh khawtualmite tih tlin hram zel dan sawrkarin a zawng mek a ti. Health Department a thawhchhan chianna nen chuan hmunkilkhawr berah pawh mipui tan rawngbawltu leh missionary a nih theih laiin khawpuia insawn duh an tam ta deuh chu hnathawktuten inenfiah nan hmang se a duh thu a sawi a. "Mahni rawngbawlna atana ngailo lo tan chuan Health Department hnuaia hnathawh chu thil hrehawm a nih bakah mipui tana harsatna thlentu nihna ni in a lang", ti in hnathawh duh nazawng te chu tihdam rawngbawlna hna thawk turin an tlak lo a ni a ti a. Phai ah mipui 5000 tan Sub-Centre 1 leh tlangram ah mipui 3000 tan sub centre 1 tawk anga ngaih a nih laiin Mizoram ah chuan mipui 3000 aia tlem daih in sub centre 1 an in tawm tih sawiin inpekna thar nena hnathawktuten tan an lak phawt chuan Mizoram in hriselna kawngah nasa takin hma a sawn thei a ni a ti.

Health Multi Purpose Service Association General Conference vawi 34-na hi an pawl President Pu P.Manliana in a kaihruai a, pawl anga hmachhawp an neih te sawihona neiin an hnathawhna atana infuihthar lehna hun hman a ni.