2914/2022-2023
Champhai, the 2nd December, 2022: CMO Office Champhai buatsaihin vawiin chawhma dar 11 khan Hmunhmeltha Community Hall-ah National Health Mission (NHM) hnuaia hriselna kawnga hmalakna hrang hrang - Family Planning, Reproductive Child Health leh Adolescent Health chungchang inhrilhhriatna hun buatsaih a ni.

He hun kaihruaitu Chief Medical Officer (CMO) Dr. R.Lianmawia chuan hriselna kawnga hmalakna pawimawh tak tak sawrkarin a kalpui thu sawiin, a hre tur leh hamthatna dawng tur te'n an hriata an chhawr tangkai chu sawrkar duhdan anih thu a sawi a. Hmunhmeltha khuaa hriselna kawnga hmalaknate inhrilhhriatna hun khawtlang hruaitu leh sikul hotute nena tangruala buatsaih a ni thei chu lawmawm a tih thu a sawi a. HIV/AIDS chungchanga hriat tur pawimawhte a sawifiah bawk a. Kalkhawmte chu zirtirna tha tak tak an ngaihthlakte ngaipawimawha zawm theuh turin a chah nghal bawk.

He hun hmanpuitu District Information & Public Relations Officer (DIPRO) Dr. Lallawmkima chuan zirlai kalkhawmte chu zirna leh hriselna ngaipawimawh tur leh ruihhlo leh a kaihhnawih laka inthiar fihlim turin a chah a. Zirna, hriselna leh infiamnate chu inzawm tlat an nih avangin ngaihthah a thiang lo a ni, a ti bawk.

Pi C.Lalramengi, National Health Mission District Programme Manager (DPM) chuan family planning leh nu leh naute hriselna chungchang a sawifiah a. Family planning chuan chhungkaw hrisel leh tha din chu a tum ber anih thu sawiin, naupang lutuka fa neih, chhang zing lutuka nau pai, nau pai laia inenkawl uluk loh, fa neih tam lutuk leh upa luktuka nau paiin harsatna a thlen theih dante leh a ngawhngte a sawifiah a. Nu nau pai damdawiin nau neite Janani Suraksha Yojana (JSY) leh Janani Shishu Suraksha Karyakaram (JSSK) kaltlanga tanpuina pek theih dante a sawi a. November atanga February-ah naupangah pneumonia a hluar zual thu sawiin, natna lanchhuah dante a tarlang a. Thisen tlakchham natna anaemia do nana rulhuthlo pek beihpui thlak anih thin thu leh National Deworming Day kum 1 ah tum hnih kalpui thin anih thu a sawi bawk.

Rilru hriselna leh hleilenna tih thupui chungchanga zirtirna petu Pi K.Lalengliani, Rashtriya Kishor Swasthya Karyakram (RKSK) Co-ordinator, National Health Mission chuan rilru leh taksa hriselna a kalkawp tlat thu sawiin, rilru hriselna chuan mahni nihna a lungawina leh tlin lohna laia inpawmthiamna leh midangte nena hriatthiamna thuk tak a kengtel a ni, a ti a. Mi rilru hrisel te'n mahni a intodelh leh dinchhuah an tum thin thu a sawi a. Rilru lam natna leh hrisel lohna awm thei hrang hrangte tarlangin, natna benvawn, chhungkaw dinhmun tha lo, ruihhlo ngawlveina, ei tur tha hmu lo leh tlakchham neih, nun kawng hrisel lo zawh, thu dengkhawng leh tharum thawhna hmanga inbeihnate chu chhan hrang hrang zinga langsar zualte an nih thu a sawi a. Rilru hahna leh thinrimnate a tha lo zawnga hmang lova insiamthatna leh hmasawn nana hmang thei tura tanlak a tul thu a sawi a. Hleilenna thleng thin laka him nana dan hnuaia dikna leh chanvo humhalh dan turte pawh tarlangin, hmalak theih dan turte pawh a sawifiah nghal bawk.

Hmunhmeltha VCP Pu Lalhmingmawia chuan kalkhawmte lawmna thu sawiin, Health Department hmalaknaa hriselna lama inzirtirna buatsaih a ni chu lawmawm tiin khawtlang aiawhin lawmthu a sawi a. Pi Marina C.Nuami, Health & Wellness Officer (HWO), Health Sub-Centre Hmunhmeltha-in lawmthu sawiin hun a khar a ni.