2915/2022-2023
Aizawl 2nd December 2022 :Kum 1984 a Bhopal Gas chhiatna rapthlak tak a nunna chan te puala kumtin a hman thin - National Pollution Control Day 2022 chu vawiin khan MINECO tualzawlah hman a ni a, he ni denchhen hian Single-Use-Plastic Free Day hman a ni bawk. He hunah hian Environment Forest & Climate Change Minister PU TJ Lalnuntluanga chu khuallian niin, Pu Lalmalsawma Pachuau IRS Secretary UD&PA chuan a kaihruai a. Chief Secretary Dr. Renu Sharma kaihhruaina hnuaiah hman khat daih plastic (Single Use Plastic) tihremna kawnga tan la turin kalkhawm ten thu tiam la in, plastic aiawh (alternative) siamtu ten an thilsiam te an phochhuak bawk a ni.

Khuallian Pu TJ Lalnuntluanga chuan thiamna leh mihring pung zelin khawvel hmasawnna nasa takin a thlen a thu a sawi a, chutih rualin heng kan ram leh khawvel hmasawnna te hian pollution a thlen ve zel avangin kan in ven thiam a ngai tih a sawi bawk. Boruak, tui leh ri bengchheng ven nan a dan siam te chu ngaipawimawh thar tura mitin ngenin Assam hnuaia awm lai atang tawhin Mizoram sorkar chuan kan ramngaw te humhalh nan tan nasa taka a lo lak tawh thin thu a sawi a, tlawmngai pawl leh sawrkar hmalakna te pawhin ngaihhlut a hlawh chho zel chu a lawmawm takzet a ni, a ti. Khawpui chhunga ramngaw siamna tur - Nagar Van Scheme chu Municipal area chauh huam tur a duan ni mahse, Mizoram district capital zawng zawng te huam teltir tur a Central sawrkar an ngenna chu tihhlawhtlin sak an nih thu a sawi bawk. Mihring pung zelah tui thianghlim mamawhna a san zel thu leh hemi kawngah hian riverine catchment area te humhalh nan Japan sorkar nen tangkawpin JICA project hnuaiah hma lak thuai a nih tur thu a sawi a. Hmankhat daih plastic te chu lui dunga nungcha ten an tuar takzet avangin a tihremna kawngah khawvel huap a tan ho ngai thil a ni, a ti a. Ram dang te nen a hnual zawnga intehkhin lova, rilru dik pu chunga a tha lamah chuan entawn hreh lova tan kan lak a ngai zawk a ni, a ti. Bawlhhlawh paih leh sawngbawl kawngah lungrual tak leh inpumkhat taka mipuite rilru (moral) chawisan zel a tul thu sawiin, Zalenna kan duh angin midang te pawn an duh ve tih hre thar theuh a, leilung tihbawhhlawh thei heng thil tha lote tihtawp kawngah tan la theuh turin kalkhawm te a sawm a ni.

He hunah hian Chief Secretary Dr Renu Sharma pawhin thusawiin plastic aia hman tur siamchhuah te an rawn inphochhuak thei chu a lawmawm takzet a ni, a ti a. Hemi kawnga hma la tu sawrkar department hmalakna hrang hrang te chu fakin, MINECO tualzawlah chauh an inpholang chu duhtawk lovin naktuk hian Millenium Centre kawtah phochhuah a nih leh tur thu a sawi. Central Pollution Control Board-in hman khat daih plastic tihtawp kawnga hma la tha state a thlanchhuahah Mizoram chu rampum huapah 12-na leh hmarchhak state te zingah 1-na a ni thei chu thil chhinchhiahtlak tak a nih thu leh ram leilung venhimna atan kan tan zual sauh sauh zel a pawimawh thu a sawi bawk.

Mizoram Pollution Control Board Member Secretary Pu C.Lalduhawma chuan hman khat daih plastic ti tawp tura hmalakna leh hmachhawp hrang hrang ah te report a pe a. Prime Minister Narendra Modi pawhin a ngaihpawimawh takzet thu sawiin, hmalakna report te chu ni 15 danah thehluh ziah a nih thu leh Central Pollution Control Board kaihhruaina hnuaiah State Pollution Control Board hrang hrang te chuan hmalakna thlirletin kartin meeting an neih ziah thu a tarlang a ni. Mizoram sawkar hnuaia department 21 bakah school 1921 leh college 11 zet te chuan hmankhat daih plastic hmang lo tura an intiam tawh thu leh office leh sikul dang thahnem takin vawiin a hun hman mek pual hian an rawn zawm ve tur thu a sawi bawk.

Single Use Plastic Free Day-ah hian college zirlaite pualin Govt. Hrangbana College-ah hun hman a ni a, Chawhnu lamah Mizoram Pollution Control Board kaihhruaiin Chawnpui High School-a EcoClub naupangte leh Chawnpui Local Council-te leh Save Mizoram River-te nen Chawnpui vênga Tuikual lui chu tihfai bawk tur a ni.

Hman khat daih sarâng (Single Use Plastics - SUPs) chu Plastic Wastes Management Rules 2021 chuan siam chhuah, hman leh hralhte a khap tâk avângin Mizoram sawrkâr pawhin hêng hman khat daih plastic-te, tirêm tura hma lâkna tur kawng (Comprehensive Action Plan) a duang fel tawh a, kumin chhûnga tirêm vek tura sawrkar laipui thupêk a nih angin tûn lai hian Special Task Force for Elimination of Single Use Plastics (SUPs)-te' n a khât tâwkin District khawpui hrang hrangah endikin an man thin bawk.