Hun engemawchen rokhawlhna hrang hrang avanga thawh lawk theih loh Thlawhtheihna kalkawng kawhhmuhtu DVOR leh DME bun hna chu Chief Minister Pu Zoram thanga hmalakna in vawiin khan Hmunpui Tlangah vuah tan a ni.

Route Navigational Facilities - DVOR (Doppler Very high frequency Omni Range) leh DME (Distance Measuring Equipment) te hi Rs 8 crore man a ni a. A vuah hna hi vawiin khan AAI (Airport Authority of India) installation engineer, Delhi atanga lo kal ten an thawk tan a. Mizoram Sawrkar hnuaia Aviation Wing lam te pawhin an enpuiin, khawl bun zawh a nih hian calibration tih leh tur a ni a, kumin November thla hian zawh beisei a ni.

 He khawl hian thlawhna thlawk mekte tan ground station atanga an dinhmun, hlat zawng leh san zawng te a hriattir dawn a. Lengpui Airport atanga aircraft thlawkchhuak leh tum turte bakah international flight te tan pawh a chhawr tangkai theih tur a ni a. Tuna Route Navigational Facilities vuah hi hman a nih hunah chuan tuna HongKong, Shanghai leh Seoul thlawhna kawng hman mek ai hian Aizawl chungah rawn thlawkin zin kawng a tawi phah thei dawn a ni.