Vawiin khan Samagra Shiksha, Mizoram leh Central Young Mizo Association-te chuan  Mizoram zirna(Pawl I-XII)-in hma a sawn zel theih nan inlungrual takin Thawhhona Thuthlung, School Education Minister Office Chamber-ah an ziak a, Thawhhona Thuthlung hi  Samagra Shiksha, Mizoram aiawhin Pu Lalhmachhuana, State Project Director-in ziakin Central YMA aiawhin Pu Vanlalruata, President, CYMA-in a ziak a, Pu Lalchhandama Ralte, Minister of State, School Education-in hming a ziah hnan bawk.

School Education Minister Pu Lalchhandama Ralte chuan a office-ah ngei Samagra Shiksha, Mizoram leh Central YMA-ten thawhhona thuthlung an han ziak ta chu lawmawm a tih thu sawiin YMA Branch, Group, Sub-Headquarters leh General Conference thlengin kan uar em em chu zirna siamthat lam a ni a, ram leh hnam humhalhtur pawhin zirna chu a  hnuk pawimawh a nih hriain YMAhian Zirna uar kum te pawh a puang a, YMA te hmalakna hi sorkar pawhin hriain thawhdunna thuthlungziah leh a ni ta chu lawmawm a tih thu a sawi. Mizoram hmun hrang hranga zirna kalpui danleh a siamthatna lam pawh lo enpuia lo venpui zel turin Minister chuan YMA te chu a sawm a ni.

Central YMA President Pu Vanlalruata pawhin thu sawiin Ram leh hnam din chhuahna atana pawimawh ber chu zirna a nih avangin ram siamtha tura Zirna lamah tihtakzeta thawh a tul thu a sawi a, zirna siamtha tura sorkar hmalakna thlawpin hmun kilkhawr zawkah zirna tha a awm theih nan uar zawkin YMA chu a thawk zel dawn tih a sawi.

Samagra Shiksha, Mizoram leh Central Young Mizo Association-ten Thawhhona Thuthlung an ziah tak hi kum 2 chhung atan a ni a, zirna siamthatna kawng hrang hrang -Naupang kum 6-14 inkar sikul kai rual, sikul kai lo dap chhuah leh sikul luhtir tura hmalakna te, Naupang rualbanlo zirna lam te, zirlai naupangten ngaihsan tur dik an ngaihsan theihna tur leh hnam ziarang inzirtirna lamahte an thawkho dawn a ni.

Vawiina thawhdunna thuthlung ziahna, Pi Esther LalRuatkimi, IRS, Commissioner & Secretary, School Education kaihhruaiah hian Serlui Bialtu MLA Pu Lalrinsanga Ralte, School Education Department Officer te leh Central YMA hruaitute an tel a ni.