Mizoram leh India State hrang hranga tuna education system kalpui mekah hian thil felhlel eng eng emaw a awm a, chuvang chuan thalai lehkha thiam sang tam takin hna tha an hmuh loh phah thin ni a hriatna a awm. Chung thil felhlel thenkhat te zingah chuan State hrang hranga zirna in ten qualification in ang lo tam tak an bithliah avang te in hmun danga thiamna sang zawk umzui duhte leh hna tha zawng duh ten harsatna an tawk thin a, Chu bakah foreign a zir duh leh hna zawng te pawhin Indian standard pawm lo tam tak an awm avangin thalai ten harsatna an tawk a, foreign degree leh qualification dawng tura ram danga zir nawn leh te a ngaih chang a tam thin a ni. Tuna kan education system hi chuan formal education/general education leh vocational education leh skill training te hi nasa takin a dah hrang a, technical education leh training lam hi “dah hnuai” anih avangin thalai tamtak in he lamah hian kal an hreh a, tuivak lo chung pawhin formal education lamah an tlan a, sorkar hna te a vang si a, hna mumal nei lo in tam tak chu an tang khang thin a ni.

Heng thil felhlel in harsatna hrang hrang a thlen thin te hria in, Central Sorkar chuan December 27,2013 khan Extra Ordinary Gazette Notification hmang in National Skill Qualification Framework (NSQF} chu a lo tichhuak ta a. He Notification hi India ram State zawng zawng a hman tur ani. Factory thil siam that leh that loh chhinchhiah nana Central Sorkar in ISI quality a bituk angin, NSQF hi zirna leh training qualification, India ram chhung leh foreign thleng pawha hmantlak a nih leh nih loh tehfung (quality)-tura hman tur a ruahman a ni.

Central Sorkar Notification ang chuan educational course leh training programme duan hrang hrang te chu December 27,2016 hnuah chuan NSQF duh dan ang tlin zo lo chu sorkar sum leh pai an dawng thei tawh lovang. Training Centres leh Zirna in hrang hrang te chuan NSQF - qualify ngei turin admission pek theih chin tur an duang chhuak vek tur a ni. Tin Central sorkar leh State sorkar te chuan an hnuaia hnathawk tur te Recruitment Rules an siam tha vek ang a, qualification te chu NSQF in a bituk ang vek ani bawk tur a ni.

He thu pawimawh tak hi State Planning Board (SPB) meeting, March 3, 2016-a Chief Minister ho a neihah khan sawiho ani a. He meeting resolution bawhzui in March 18, 2016 khan Planning Deptt. Conference Hall ah meeting neih ani a, He Meeting hi Pu Haukhuma Hauzel, SPB Member-Secretary (i/c Skill Dev.) in a kaihruai a, Deptts. hrang hrang-Agriculture & Allied, Industries, Finance, Transport, L&E, Higher & Tech. Edn.,GAD etc. aiawh senior officer te an kal tha hle a ni. Hmalak dantur hrang hrang zingah, Skill Sector Council of India peng hrang hrang te nena thawh chhunzawm dan tur te sawiho ani.