Vawiin 23.3.2016 khan Rajiv Gandhi National Institute for Youth Development (RGNIYD), Sriperumbudur, Tamil Nadu leh State Institute of Rural Development (SIRD), Mizoram, Kolasib tangdun buatsaihin Mahatma Gandhi Hall, State Institute of Rural Development, Mizoram, Kolasib-ah Kolasib District chhunga High School 14 atanga zirlai naupang 100 te tan Career Counseling Workshop neih a ni a, Pu H. Lalengmawia, IAS, Deputy Commissioner, Kolasib District chuan he Workshop hi a hawng.

Workshop hawnna hi Pi Maria CT Zuali, Director, State Institute of Rural Development chuan kaihruaiin, Kolasib District chhung High School hrang hrang atanga naupang lo kalkhawmte lawmna thu sawiin, tun atanga kum 10 vel lo la awm tura ram hruaitu ni mai turte hnena Career Counseling training neih a ni thei chu lawmawm a tih thu a sawi a. Hun chep tak kara kan sawmna ngai pawimawh a Deputy Commissioner, Kolasib District-in a hawnna hun min rawn hmanpui thei chu lawmawm a tih thu sawiin, District Education Officer, Kolasib District-in School naupangte min kohkhawm sak avang leh Zirtirtute pawhin an Zirlai naupangte an rawn tirh avangin lawmthu a sawi a. Tin, Resource Person atana kan sawmna ngai pawimawha Pu Lalhmingliana, ASO, DC Office, Kolasib-in min tihhlawhtlin sak theih dawn avangin lawmthu a sawi bawk.

Deputy Commissioner Pu H. Lalengmawia chuan hawnna thu sawiin, Mizote hi huau huau leh hlimhlawp lamah kan kal dul dul thin a, thu tak, hla tak kan ngai pawimawh leh si lo thin hi a pawi hle a ni. Hetianga kan kal reng chuan kan la tlu chhe thuai ang tih a hlauhawm hle a ni, a ti a. Chuvangin vawiin a lo kalkhawmte chuan an thil zir turte uluk taka ngaihtuah a, hlawkpui tum ngei turin a chah a ni.

Khuallian chuan vawiina in in thu ngaihthlak tur hi BA/MA innih hunah chuan awmzia a nei tam tawh dawn lova, tun hi a hun lai tak a ni a. Chuvangin hman tangkai ngei in tum dawn nia, tiin School naupangte chu a chah a ni.

Hlawhtling tur chuan Mahni Inrintawkna neih a ngaih thu te, Tumruhna tak tak neih angaih thu te, Taimakna leh thawhrimna nena beih a ngaihthu te leh Thil a engzawnga thlir thiam te a tul thu sawiin, chung hlawhtlinna atan a pawimawh, miropui leh hlawhtlingte’n an neih ang chu in nei vek a, in hman that leh thatlohah a innghat a ni, a ti a. Hmanrua in neih hmang khan in tum tihlawhtling turin Lecture in ngaihthlak turte uluk taka ngaithla turin a chah bawk a ni.

Workshop hawnna neih a nih zawh hian Pu Lalhmingliana, MCS, ASO, DC Office, Kolasib chuan School naupang kalkhawmte chu Career Planning leh Career Management tih thupui hmangin nilengin zirtirna a pe a ni.