Chief Minister Pu Lal Thanhawla hmalaknaa Mizorama hna zawngtu ten awlsam taka hna an zawn theihna tur, Mizoram Youth Commission hnuaia Job Portal duan mek chu vawiin chawhnu khan Labour, Employment & Industrial Training Minister of State Pu Lalrinmawia Ralte Office Chamber ah a duangtu Radiant Group mithiam te nen thlirho a ni.
Pu Lebbaeus Denis, CEO, Radiant Integrity Techno Solutions Pvt. Ltd., Chennai chuan powerpoint presentation hmangin he Job Portal kalphung tur leh a kalpui dan tur te a sawifiah a, Mizoram kil tin atanga computer / internet emaw mobile sms hmanga hna zawngtu ten an thiamna mil leh hna thawh duh zawng te, Mizoram, India ram leh ram pawn thlenga hnaruak thlira, mahni awmhmun atanga awlsam taka an dil theihna tura duan a nih dan te a tarlang a, he Job Portal hi Mizoram-a chengte puala a bik taka duan a nih dan te a sawifiah bawk.
Hemi atan hian hna zawngtu te hming leh chanchin ziah luh hmasak vek phawt a ngai dawn a, chumi peih fel vek a nih hnuah hna zawngtu chuan a hna thawh duh zawng hnaruak a awm ve leh sms hmangin a lo dawng mai dawn a ni. He Job Portal ah hian thawktu zawngtu/mamawhtu Company te hming leh address leh biakpawhna tur te tarlan vek a ni bawk ang a, hna zawngtu chuan mobile phone hmangin a hna dil duhzawng a lo ngaihven tawh mai dawn a ni. Lehkha zir sang lo, thiamna bik tak nei tan pawh he Job Portal ah hian hna zawn theihna tur ruahman tel a ni bawk a ni.
Minister Pu Lalrinmawia Ralte chuan Mizoram kil tin atanga hna zawngtu te tana awlsam zawka hna zawnna duan a ni chu lawmawm tiin mi tam takin hna hmuh nan an hman tangkai ngei a beisei thu a tarlang a, he MYC Job Portal thlirhona hi Mizoram Youth Commission Chairman Pu T.Sangkunga leh LE&IT Director Pu Rotluanga te pawhin an hmanpui bawk a ni.
