1452/2023-2024

Champhai the 10^th August, 2023- Nimin khan Champhai District Skill Committee buatsaihin Hnahlan Higher Secondary School, Hnahlanah SKILL CAMP neih a ni.

He hun hi Hnahlan Higher Secondary School Principal Pu Lalduhchhunga’n a kaihhruai a. Principal chuan sorkar hmalakna chu fakawm a tih thu sawiin zirlaite tan beiseina thar siamtu ni se tih chu duhthusam a ni ti bawk.

He hun hmanpuitu Pu Moses Lalfakawma Tlau, SDC Champhai chuan zirlaite chu lehkahzir piah lamah eng emaw tal thiamthil chhenfakawm tak neih tum turin a fuih a. Eng dinhmunah pawh ding ila, midangin min chhuhsak theih mai mai loh thiamna kan neih chuan keimahni mai bakah khawtlang tan pawh a tangkai dawn tih a sawi. Tin, thiamthil nei tur chuan entawn tur dik entawn leh kawm tam te, thil hrang hrang tih kual chhin te,  thil chik peih te a pawimawh thu a sawi bawk.

Resource Person Pu Prannav Dutta, Mahatma Gandhi National Fellow-in  zirlaite chu tunlai thiamna hmang tangkai turin a chah a, social media kan hman nasat mek lai hian hna zawnna atana hman tur internet-ah hian tam tak a awm thu sawiin chu’ng inhrilhhriatna te chu a neihpui nghal a. Kan thiamna chu certificate nen tangkawp neih zel chu nakina hna hmuh awlsam phahna a nih theih thu a sawi.

VCP Pu Lalremruata Cherput pawhin zirlaite tan hetiang ang skill development hun hlu tak buatsaih a ni chu Champhai DC Pu James Lalrinchhana kaihhruai District Skill Committee te hmalakna fakawm a tih thu a sawi a. Sorkar hna vang tak karah mahni inhaikaw thiam leh thiamthil hmantlak ngah apiang an vannei mai dawn nia a lan thu a sawi bawk.

Chawhma leh chawhnu first leh second session a then niin chawhnu lamah hian zawhna leh chhana hun hman a ni a. Zirlaite leh zirtirtute hnen atanga zawhna hrang hrang awm te chhangin hlawkthlak taka hun hman a ni.  Zirlai-ten an kal leh zelna tura an hriat duh zawng tam tak an hriat phah nasa hle a, kal khawmten hlawkpui an inti hle. He camp hian zing dar 11:00am aṭanga tlai lam dar 3:30pm thleng a awh a ni.