3869/2022-2023
Champhai, the 16th March, 2023: Indian Medical Association (IMA), Mizoram Government Doctors' Association (MGDA) leh Indian Dental Association (IDA) tangkawp buatsaihin vawiin khan Hnahlan PHC leh Hnahlan Higher Secondary School-ahte Special Clinics buatsaih a ni.

Health & Family Welfare Board Vice Chairman, Dr. ZR Thiamsanga, Champhai North bialtu MLA ni bawk chuan a bial chhung Hnahlan khua leh a chhehvelte tana Special Clinics lian tham tak, mipuite hriselna kawnga pawimawh leh remchang tak buatsaih a ni chu lawmawm a tih thu a sawi a. Doctor thiam tak tak leh an thawhpui lam hla tak tak atanga lokalte thinlung taka a lo lawm thu leh an thahnemngaihna fakawm a tih thu a sawi a. Khawpui Damdawi In Hnahlana chhawphnaia Special Clinics buatsaih a ni chu mipuiten an tangkai pui ngei a beisei thu sawiin, mipuite hriselna leh hemi kawnga hmalaknate tihchangtlun kawngah theihtawp chhuah zel tum a nih thu a sawi bawk.

A khuhhawnna hun tawi tukin dar 7:30 a Hnahlan PHC tuala neih hi Dr. Lalhmuchhuaka, Convener chuan kaihruaiin inhmelhriattirna hun a hmang a. Hnahlana Special Clinics buatsaih chu pawl pathum kaihhruaia Special Clinics buatsaih tum 8-na a nih thu a sawi a. Mizoram hmun kilkhawr zawkahte Spacial Clinics neih leh zel an tum thu a sawi a. Damdawiin tha leh thawktu thiam tak takte mipuite tana sawn hnai a nih thu sawiin, buatsaih a nih theih nana sum leh pai bakah hun leh tha sengtute hnenah lawmthu a sawi bawk.

Hnahlan Special Clinics buatsaihah hian Specialist leh Super Specialist/Doctor 38, Supporting staff 8 leh Driver 6 te an tel thei a, Team member-te hi Sawrkar, mimal leh Private Hospital-a thawktute atanga kalkhawm an ni. A thlawna inentir a nih bakah hian damdawi engemawzah a thlawna sem chhuah niin, damdawi sem chhuah tur lei nan hian H&FW Board Vice Chairman Dr. ZR Thiamsanga, Champhai North bialtu MLA ni bawk chuan Rs.1,50,000/- a tum sak bakah mi thil phal ten an thawh bawk a ni.

Special Clinics hi hlawm lian takin hmun hnihah neih a ni a; Hnahlan Higher Secondary School-ah Skin (Vun), Paediatrics (Naupang lam) leh Opthalmology (Mit lam) entirna hawn a ni a. Hnahlan PHC Building-ah ENT (Beng, hnar, hrawk lam), Obstetrics & Gynaecology (Hmeichhe lam), General Medicine (Natna tlanglawn), General Surgery (Inzai lam), Orthopaedics (Ruh lam) leh Dental (Ha lam) entirnate bakah khawl hrang hrang hmanga inentirna, Sonology (Kawchhung enna), ECG (Lung enna), Physiotherapy, Endoscopy (Ril enna khawl) leh Audiology (Ri hriatna lam) entirnate hawn a ni bawk.

Chhinchhiah danin vawiin chawhnu dar 3 thleng khan IMA, MGDA leh IDA tangkawp buatsaih Hnahlan Special Clinics buatsaihah hian damlo mai bakah mahni hriselna thlithlaia inentir mi 2,000 bawr vel an awm tling tawh a, Special Clinics hi kalpui chhunzawm mek zel a ni. Chawhnu dar 3 thleng khan khawl hrang hrang hmanga enfiah zingah Endoscopy hmanga enfiah mi 45, ECG (Lung enna) hmanga enfiah 22 leh Ultrasound hmanga enfiah mi 139 te an awm a. Ha phawi sak mi 68, Intra articular injection pek mi 53 leh inzai tenau minor surgery tih sak mi 11 an awm tling a ni.

Hnahlan Special Clinics hi mipuiten an hlut hle a, Hnahlan leh khaw dang 15 te bakah thenawm ram Myanmar khaw 3 atangtein pantu an awm bawk a ni.