3868/2022-2023
Aizawl, 17th March, 2023 : Tunhnaia hmarchhak state ten Antiretroviral Therapy (ART) damdawi chatlak vanga HIV positive ART damdawi ei mek ten harsatna an tuar mek anga thuthang awm chungchangah Mizoram State AIDS Control Society (MSACS) chuan thu diklo a nih thu a hnuaia tarlan ang hian thuchhuah an siam.
Mizoramah hian ART damdawi - Abacavir leh Lamivudine chawhpawlh AL-Adult damdawi ei lai HIV hrik kai zingah 76 an awm a. He damdawi hi damdawi chawhpawlh (Regimen) thar TLD ei thei lo te hnenah chauh pek a ni a. Mizoramin AL-Adult damdawi hi kan tlachham lova, naupang eitur puitlinga pek an ni hek lo. Damdawi hi a ei thinte chu an taksa dinhmun enin an eitur zat hi chhut thin a ni a, chumi mil chuan pek thin an ni zawk a ni. Tunah hian Mizoram hian AL-Adult damdawi thla khat ei aia tam kan la nei a, ATV/r damdawi pawh ART centre hrang hrangah thla 6 aia tam tla tur a la awm bawk. Heng damdawite hi Mizoram hian tun dinhmunah a tlachham lo a ni.
AL-A Assam SACS in an tualchhung suma an lei mum 7500 vel chu Maharastra-a supplier warehouse atangin thawn chhuah a ni tawh a, rei loteah a thleng thuai ang. Central atanga AL-A supply pawh CMSS atangin March thla laihawl velah SACS a thleng ang. Chu bakah, a nghah hun chhunga harsatna awm palh thei sukiang turin Mizoram SACS chuan AL-Adult damdawi hi Deccember 2022 khan NACO in State hnena pawisa a pek sa hmanga lei lawk a lo ni tawh bawk.
Supply Chain Management Committee hi bungrua a hun taka a lo thlen theih nan MSACS chuan a din a, indaih loh hlauh thawnawm a awm chuan he committee hian hma a la nghalin a chingfel nghal thuai thin a ni. ARV damdawi awm zat te hi State leh ART centre tinah chik taka enfel reng a ni thin. ARV damdawi thawn chhuah leh sem rual chungchang pawh State AIDS Control Society leh Supply Chain Management, NACO nen hunbi neia inrawn thin a ni a, stock dinhmun thlir hona hi neih thin a ni.
Chuvangin, A chunga sawi ang hian, ARV damdawi tlakchham thu hi Mizoramah tun dinhmunah hian a awm lova. AL-A leh ATV/r damdawite hi kan nei tha tawk a ni.
