3867/2022-2023

Aizawl, the 16th March, 2023: Vawiin khan Power & Electricity Department Minister Pu R. Lalzirliana hovin E-in-C Conference Hall, MINECO-ah Power & Electricity Department hnathawh dan leh hnathawh mekte thlirhona ‘Works Review Meeting’ neih a ni a. He Review Meeting-ah hian Commissioner & Secretary, P&E Pu H. Lalengmawia chu khualzahawm niin Mizoram district hrang hrang atangin P&E Department-a thawk Engineer-te an tel kim hle a ni.

P&E Department Works Review Meeting hawnna inkhawm E-in-C Er. Lalhmingliani Hmar kaihhruaiah Khuallian P&E Minister Pu R. Lalzirliana chuan thiamna chuan engemaw chen mihring tizahawm mahse zahawmna tak tak chu mihring nungchangah a innghat ber a ni tiin P&E hnuaia hnathawk zawng zawngte chu dik tak leh hlei nei lova thawk zel turin a chah a. Tunlai khawvelah kawlphetha tel lovin eng hna mah a thawh theih loh tih hial a nih tawh avangin power supply pekchhuah tur a pung tulh tulh a, staff indaihlohna karah hnathawh tur tam zel chuan P&E department hnuaia hnathawk zawng zawngte tan chona tling se, bahlah miah lova mipui mamawh phuhruka theihtawp chhuah zel turin kalkhawmte a chah bawk. P&E Department hnathawh dan chungchang sawiin Minister chuan tun dinhmunah Mizoramin eng a hmu tha a, inhmakhuana chang hria a, transformer thar bunna hmun tur zawnchhuah kawngah pawh an taimakna a fak a, thingtlang lamah pawh sorkar hnathawh a lang tan viau tawha a hriat thu leh lawmawm a tih thu a sawi bawk. P&E Department hnuaia hnathawk zawng zanwgte chu ram neitu thinlung tak tak pu chunga hnathawk zel turin duhsakna a hlan.

Commissioner & Secretary, P&E Pu H. Lalengmawia pawhin thusawiin a thim a var thlu lova mipuite rawngbawlna a ni tih hriaa theihtawp chhuah thin P&E Department hnuaia thawk zawng zawngte chungah lawmthu a sawi a. Hnathawh theih hun (Working Season) chhunga mamawh chahkhawm (procurement) tihfel te, a hun taka contractor-te bill pek (timely payment) te, hnathawh vil uluk (monitoring) te ngai pawimawh turin a chah. Power Corporatisation lamah pawh hmalak thar a ni thuai ang a ti.

Engineer-in-Chief, P&E Er. Lalhmingliani Hmar chuan kawlphetha pekchhuah that chu department tum (target) a nih rualin sum lakluh (revenue) hi department hlawtlinna tehfung pawimawh tak a ni thung a ni a ti a. P&E hnuaia thawk zawng zawngte, Division hrang hrangte hnathawh that lama inelna tur siam a ni dawn a, department chhungah inchawhthawh nana hmalakna thar a ni ang a, hnathawk thate tan lawmman (award) siam a ni ang a ti.

Vawiin Review Meeting hawnna inkhawmah hian Power & Electricty Department-in North East Transmission Company (NETC)-a ‘shares’ a lei atanga kum 2022-2023 chhunga dividend a hlawhchhuah cheng 4,93,68,000.00 chu NETC Asst. Manager Pu Bikash Kumar Nayak chuan P&E Minister hnenah a hlan nghal a ni.